ଶୁଭ ଦିନ
ଶୁଭ ଦିନ
ବାର ମାସେ ତେର ପରବ ପାଳନ
ଓଡିଶା ରାଇଜେ ହୁଏ
ଆମ ଏ ସଂସ୍କୃତି ଆମ ପରମ୍ପରା
ନାନା ନୀତି ଶିକ୍ଷା ଦିଏ ।
ବଇଶାଖ ଶୁକ୍ଳ ପକ୍ଷ ତୃତୀୟାରେ
ପଡେ ଅକ୍ଷୟ ତୃତୀୟା
ଅକ୍ଷି ମୁଠି ଶୁଭ ଅନୁକୂଳ ହୁଏ
ମହା ଲକ୍ଷ୍ମୀଙ୍କର ଦୟା ।
କୃଷକ ଘରଣୀ ଘର ଦ୍ୱାର ଲିପି
ଅକ୍ଷି ମୁଠିକୁ ସଜାଏ
ସିନ୍ଦୂର ଚନ୍ଦନ ଟୋକେଇରେ ଦେଇ
ପିଠାପଣା ଭୋଗ ଦିଏ ।
ଝୋଟି ଚିତାସାଥେ ପୂର୍ଣ୍ଣକୁମ୍ଭ ଥୋଇ
ହୁଳହୁଳି ଦେଇ ଥାଏ
କୃଷକ କ୍ଷେତକୁ ଅକ୍ଷି ମୁଠି ନେଇ
ଖୁସି ମନେ ଯାଇଥାଏ ।
ଐଶାନ କ୍ଷେତରେ ଅକ୍ଷି ମୁଠି ବୁଣି
ଲକ୍ଷ୍ମୀଙ୍କୁ ପୂଜା କରଇ
ବରଷକ ପାଇଁ କ୍ଷେତରେ ଫସଲ
ଘରକୁ ଅମଳ ପାଇଁ ।
ଆମର ସଂସ୍କୃତି ଆମ ପରମ୍ପରା
ରଥକାଠ ଅନୁକୂଳ
ଶ୍ରୀକ୍ଷେତ୍ରରେ ହୁଏ ଚନ୍ଦନ ଯାତରା
ଆରମ୍ଭର ଶୁଭ ବେଳ ।
ପର୍ଶୁରାମ ଙ୍କର ଏହି ଦିନ ଜନ୍ମ
ଗଙ୍ଗା ଆସିଲେ ମର୍ତ୍ତ୍ୟକୁ
ଧରାଵତରଣେ ମାତା ଅନ୍ନପୂର୍ଣା
ପାଳେ ସଂସାର ସର୍ତ୍ତକୁ ।
କବି ଜୟଦେବ ଜନ୍ମ ହୋଇଥିଲେ
ଲେଖିଲେ ଗୀତ ଗୋବିନ୍ଦ
ମାତା ସୀତାଙ୍କର ଭୂମିରୁ ଜନମ
ଜନକ କୋଟି ଆନନ୍ଦ ।
ଏପରି ଦିନଟେ ଆମ ସଂସ୍କୃତିରେ
କେହି କଣ ଭୁଲି ପାରେ
ଶୁଭ ଦିନ ଟିଏ ସବୁ କାର୍ଯ୍ୟ ପାଇଁ
ଆସିଥାଏ ଜୀବନରେ ।