ରଜ ସଜ ବାଜ

ବନସ୍ତରେ ଗଜ ଡାକୁ କି ନଡାକୁ

ବରଷକୁ ଥରେ ରଜ

ଉନ୍ମାଦନା ଆଣେ ସ୍ୱରର ଝଙ୍କାରେ

କୁମାରୀର ସଜବାଜ। {୧}

ଛାଇଯାଏ ନଭ ନବ ପ୍ରାବୃଟର

ଝରଇ ବୁନ୍ଦା ବରଷା

ନବ-ବାରିଦକୁ ସମ୍ଭାଷଣ କରି

ହରଷେ ନାଚଇ ଚଷା। {୨}

ବର୍ଷୁକୀ ମେଘର କଜଳ ଲଗାଇ

ରଜୋବତୀ ବସୁମତୀ

ଖିଲିଖିଲି ହସେ ପଲ୍ଲୀ ରମଣୀଟା

ନଣନ୍ଦ ଭାଉଜ ପ୍ରୀତି। {୩}

କଟା ବଟା କୁଟା ଚୁରା ରଗଡାରେ

ଓଡିଆଣୀ ବୋହୁ ମାତେ

ଗାଧୁଆ ତୁଠରେ ଥଟ୍ଟା-ଟାପରାରେ

ପହିଲି ରଜ ଟା ବିତେ। {୪}

ମଥାରେ ଚନ୍ଦନ କୁଙ୍କୁମର ଟିପା

ଲଗାଇ ପାଦେ ଅଳତା

ଖାଇ ପୋଡ ପିଠା ନବ ବଶନରେ

ହାସ ପରିହାସ କଥା। {୫}

ଆମ୍ବ ତୋଟା ନାଚେ ଦୋଳି ଦୋହଲାଇ

କୁଆଁରୀ କଣ୍ଠ ସଙ୍ଗୀତ

ନୂଆ ନୂଆ ଲାଗେ ଗ୍ରାମ୍ଯ ଦାଣ୍ଡ ସତେ

ଗୃହେ ମାଂସ ଝୋଳ ଭାତ। {୬}

ବାଗୁଡିର ଖେଳ ଗ୍ରାମ୍ଯ ଯୁବଦଳ

ବୃଦ୍ଧଙ୍କର ପଶାପାଲି

ଆମୋଦିତ ଭରେ ଦେଖଣାହାରୀର

ଦେଉଥାନ୍ତି କରତାଳି। {୭}

ଭରିମସଲାରେ ଖିଲିଖିଲି ପାନ

ସଞ୍ଚରଇତ ବାସନା

ପୂତ-ଧୂମ-ଧୂପ ଆଣେ ପବିତ୍ରତା

ଉପବାସ ଉପାସନା। {୮}

ହଳ କରଷିତା ବସୁମତୀ ମାତା

ହୋଇଥାଏ ରଜୋବତୀ

ଭୂଇଁ ନଅଣରେ ଭୂଖନନ ମନା

କୃଷି ପରମ୍ପରା ରୀତି। {୯}

କୃଷିର ସଂକଳ୍ପ କୃଷକ ମନରେ

କରି କର୍ମ ତତପର

ହୋଇଯାଏ ଅନ୍ତ ଆମୋଦ ଉଲ୍ଲାସେ

ସମ୍ଭାଷଣି ବାରିଧାର। {୧୦}