ଖୋଲିଲା ତାଲା
ଖୋଲିଲା ତାଲା
ଖୋଲିଗଲା ତାଲା ସବୁଆଡେ ମେଲା
ମାନବ ଟେକିଲା ହାତ ।
କୋରନା ଯୁଦ୍ଧରେ ପରାଜିତ ଆମେ
ଖାଇ କୋରନାର ନାତ ।।
ସରକାରଙ୍କର କଡା ଚେତାବନୀ
ସାହସ ହରେଇ ଦେଇ ।
ବଞ୍ଚିବାକୁ ହେଲେ ନିଜର ସୁରକ୍ଷା
ନିଜେ ହିଁ କରିବା ପାଇଁ ।।
ରଖିଥିଲେ ଯାହା ସରିଗଲା ତାହା
ରାଜକୋଷ ହେଲା ଶୂନ୍ୟ ।
କୋରନା ଯୋଜନା କାମ ଦେଲାନାହିଁ
ଶାନ୍ତ ହୋଇଗଲା ମନ ।।
ଦେଶ ଅର୍ଥନୀତି ଦୁର୍ବଳ ହେଲାଣି
ନାହିଁ ରୋଜଗାର ପନ୍ଥା ।
ଜୀବନ ଜୀବିକା ନାଶ ହୋଇ ଚାଲେ
ବନ୍ଦ ହୋଇ ସବୁ ସଂସ୍ଥା ।।
କୋଟି କୋଟି ଟଙ୍କା କୋରନା ଖାଇଲା
କାଙ୍ଗାଳ ହୋଇଲା ଦେଶ ।
ଦେଶରେ ରାବଣ କିଛି ବାଣ୍ଟି ନେଲେ
ଖାଇଲେ କୋରନା ମାଂସ ।।
ରାବଣଙ୍କ ବାସ ସୁରକ୍ଷା ଖୋଳରେ
କୋରନା କରିବ କିସ ।
ସାଧାରଣ ଜନ କୋରନା ଯୋଦ୍ଧାଙ୍କୁ
ଘାରୁଛି କୋରନା ବିଷ ।।
ଆଦିମ କାଳକୁ ଫେରିବା ସମସ୍ତେ
ପାଖେଇ ଆସୁଛି ବେଳ ।
ବିଜ୍ଞାନ ବଳରେ ବିଳାସ ଜୀବନ
ଆମ ପାଇଁ ହେଲା କାଳ ।।
ପ୍ରକୃତି ନିୟମ ଉଲଂଘନ କଲେ
ସନ୍ତୁଳନ ହେଲା ନଷ୍ଟ ।
ଦୈବୀ ଦୁର୍ବିପାକ ଆସିବ ଅନେକ
କୋରନାଠାରୁ ବି ଦୁଷ୍ଟ ।।
ହୋଇ ଅହଙ୍କାରୀ ପ୍ରଭୁତ୍ୱ ବିସ୍ତାରି
ଆମ ଦାଦାଗିରି ନୀତି ।
ପରିବେଶ ଧ୍ୱଂସ ଜୀବଜନ୍ତୁ ନାଶ
ବଦଳି ନାହିଁ ପ୍ରକୃତି ।।
ଜଳ ସ୍ଥଳ ବାୟୁ ପ୍ରଦୂଷିତ କଲେ
ନିଜ ସ୍ୱାର୍ଥ ସିଦ୍ଧି ପାଇଁ ।
କୃତ କର୍ମ ଫଳ ଭୋଗିବା ନିଶ୍ଚୟ
ଏଥିରେ ସନ୍ଦେହ ନାହିଁ ।।
ଜୀବନ ଯୁଦ୍ଧରେ ବଞ୍ଚିବାକୁ ହେବ
ଲଢେଇ କରିବା ଏକା ।
କୋରନା ଭୁତାଣୁ ମୃତ୍ୟୁ ଦଣ୍ଡେ ଦଣ୍ଡି
ଦେଉଅଛି ଏହି ଶିକ୍ଷା ।।