ନିର୍ବାଚନ ଥାଳି

ନିର୍ବାଚନୀ ଥାଳି   ପଡୁଛି ଉଛୁଳି 

   ଗ୍ୟାରେଣ୍ଟିର ବର୍ଷା ଜଳେ 

ପ୍ରତିଶ୍ରୁତି ଥୋପ ଗୁନ୍ଥି ନେତାମାନେ 

    ବୁଲୁଛନ୍ତି ଘରେ ଘରେ ॥

ମତଦାତା ମାନେ ଚାହାନ୍ତି ବିକଳେ 

   ଗିଳିବାକୁ ସେହି ଥୋପ

ବିଶ୍ୱାସ ହେଉନି ନେତାଙ୍କ ଉପରେ 

  କେତେ ସତ କେତେ ମିଛ ॥

କେତେ ପ୍ରତିଶୃତି ପ୍ରତାରଣା ହୋଇ 

    ସ୍ମୃତିରେ ରହିଛି ଚେଇଁ 

ବିଗତ ଦିନରେ ଦେଇଥିଲେ ନେତା 

    ପୂରଣ କରିବା ପାଇଁ ॥

ଭରସା ପାଉନି  ନେତାଙ୍କ ଉପରେ 

    ଗର୍ଜନ କରନ୍ତି ଭାରି 

ନିର୍ବାଚନ ଋତୁ    ସରିଗଲା ପରେ 

    ଚାହାଁନ୍ତିନି ଥରେ ଫେରି ॥

ଇସ୍ତାହାର ଦେଖି   ଗରିବ ପଶିଛି 

   ଯେହ୍ନେ ଆଖୁ କିଆରୀରେ 

ହିସାବ କରୁଛି କେଉଁଆଡେ ଗଲେ 

   ରହିବ ବେଶି ଲାଭରେ ॥

  

ଭାବୁଛି ମନରେ ବଞ୍ଚିବା ନିମନ୍ତେ  

   ମାଗଣାରେ ଖଣ୍ଡେ ଲୋଡ଼ା 

ପ୍ରତିଶୃତି ମିଳେ ଖଣ୍ଡେ କାହିଁପାଇଁ 

  'ଦେବି ତୋତେ ଏକ ବିଡ଼ା'॥

ଧନୀକ ଚାହୁଁଛି ଧନୀ ହେବ ବେଶି 

    ରାଜନୀତି ସାହାରାରେ 

ବିଡ଼ା ବିଡ଼ା ଟଙ୍କା ଫିଙ୍ଗି ଦେଉଅଛି 

    ନିର୍ବାଚନୀ ଥାଳିଆରେ ॥

ମଧ୍ୟବିତ୍ତ ବସି   ମନରେ ଭାବୁଛି 

   କାହାକୁ ଭୋଅଟ ଦେବି 

ଗରିବ ପାଉଛି   ଧନୀ ବି ପାଉଛି 

   କେଉଁ କୁଳର ମୁଁ ହେବି ॥

ବିଜେଡି ବିଜେପି ଗ୍ୟାରେଣ୍ଟି ପାହାଡ଼ 

   ଦେଖିକି କଂଗ୍ରେସ ଦଳ 

ଜଳକା ହେଇକି  ଚାହୁଁ ଚାହୁଁ ତାର 

   ଭାଙ୍ଗିଯାଏ ମନୋବଳ ॥

କରେ କସରତ  ଜାତୀୟ କଂଗ୍ରେସ 

    ପ୍ରତିଶୃତି ମାଳା ଧରି 

ମାଳାକୁ ତାହାର   ମିଳୁନି ଆଦର 

    ମନ ତା ଯାଉଛି ମରି ॥

ମତ ହାତେଇବା ନିଶାରେ ନେତାଙ୍କ  

    ଲମ୍ବା ଇସ୍ତାହାର ଦେଖି 

ମତଦାତାମାନେ   ଚକିତ ହୁଅନ୍ତି 

    ଆଖିଯାଏ ତାଙ୍କ ଲାଖି ॥

ଯୁବକ କୃଷକ   ନାରୀ ମଧ୍ୟବିତ୍ତ 

    ଧନୀ ଓ ଗରିବ ନାମେ 

ଜନ୍ମରୁ ମରଣ  ମାଗଣା ଯୋଜନା 

  ଫଳ ଦେବେ ନେତା ଦାନେ ॥

ରାଜନୀତି ଯଦି ଜନତାଙ୍କ ସେବା 

   କହୁଛନ୍ତି ସବୁ ଦଳ 

ହାତରୁ ଖାଇକି ସେବା କରିବାକୁ 

  କାହିଁ ଏତେ ଗଣ୍ଡଗୋଳ !!

   

ଗଣ ମାଧ୍ୟମରେ ବିଜ୍ଞାପନ ସ୍ରୋତ 

   ପରସ୍ପର ଗୋହି ଖୋଳି 

ଉପରେ ଶତ୍ରୁତା ଦଳ ଦଳ ମଧ୍ୟେ 

  ଅନ୍ତରାଳେ କୋଳାକୋଳି ॥

କାହା ଭଲ ନୀତି କେହି ଦେଖନ୍ତିନି 

   ନିଜର ପ୍ରଶଂସା କରି 

ପରସ୍ପର ପ୍ରତି   କାଦୁଅ ଫିଙ୍ଗନ୍ତି 

    ଦୁର୍ନୀତି ଦୁର୍ଗୁଣ ଧରି ॥

ଜନତାଙ୍କ ଠାରୁ ପ୍ରତ୍ୟେକ୍ଷରେ ନେଇ 

   ମାଗଣା ଯୋଜନା ପାଇଁ 

ମହାଦାନୀ ସାଜି ଧନୀ ବି ହୁଅନ୍ତି 

   ପରୋକ୍ଷରେ ଦାନ ଦେଇ ॥

ଆସନ୍ତୁ ସମସ୍ତେ ବିଚାର କରିବା 

   ବୁଦ୍ଧି ଵିଵେକ ଖଟେଇ 

ଉପଯୁକ୍ତ ପ୍ରାର୍ଥୀ କରିବା ଚୟନ 

  ମୂଲ୍ୟବାନ ମତ ଦେଇ ॥