ଅଭୁଲା ସ୍ମୃତି

 ଅଦିନିଆ ଝଡ଼ ଭାଗ୍ୟ ଆକାଶରେ 

   ଅଚାନକ ଆସେ ମାଡ଼ି 

ଆଖିରୁ ମୋହର ଶ୍ରାବଣର ଧାରା 

    ଅହରହ ଯାଏ ଗଡି ॥

ଅତଳ ଗଭୀର ସଂସାର ସାଗରେ

  ଅଲୋଡ଼ା ଭାଗ୍ୟ ମୋ ସାଥି

ଆଖି ଖୋଜୁଥାଏ ବଞ୍ଚିବା ସାହାରା

    ଅତୀତକୁ ଝୁରି ନିତି ॥

ଅଚାନକ ଦିନେ ଭେଟ ହୋଇଗଲ 

     ଆଶାର ମଶାଲ ଧରି

ଅସୁମାରୀ ସ୍ୱପ୍ନ ଦେଖେଇଲ ମୋତେ 

    ଆପଣାର ନେଲି କରି ॥

ଅଳିକ ଆନନ୍ଦେ ବିଭୋର ମୁଁ ହେଲି

    ଅତି ନିକଟରୁ ପାଇ

ଆମ ସପନରେ ନାୟିକା ସାଜିଲ

   ଅଖ୍ୟାତ ନାୟକ ମୁହିଁ ॥

ଅଜଣା ରାଇଜେ ଚାଲିଯିବା ବୋଲି

    ଅଳି ଶୁଣୁଥିଲି ତୁମ

ଆମ କଳ୍ପନାର ମହଲ ତୋଳିବା

   ଅମର ହୋଇବ ପ୍ରେମ ॥

ଆମ ଗତି ପଥ ହୋଇଲା ବିଭକ୍ତ 

   ଆପଣାରୁ ହେଲ ପର

ଅଜଣା ସାଥୀର ହାତ ଧରି ତମେ

  ଆନେ ଗଢିଲ ସଂସାର ॥

ଆମ ପ୍ରେମ ଏବେ ସ୍ମୃତିର କାହାଣୀ 

   ଅତୀତ ଯାଇଛି ହଜି

ଅମାନିଆ ମନ ବୁଝୁନାହିଁ କେବେ

   ଆଉ ପାଇବିନି ଖୋଜି ॥

ଅନ୍ୟ କାହା ପାଇଁ ଜନମ ତୁମର

   ଅଧା ରହିଲା ସପନ 

ଅତୀତ ସ୍ମୃତିକୁ  ବୃଥାରେ ଅଣ୍ଡାଳି  

   ଅସ୍ଥିର ହେଉଛି ମନ ॥

ଅସହ୍ୟ ଯନ୍ତ୍ରଣା ହୃଦୟ ଭିତରେ 

   ଅଭୁଲା ପ୍ରୀତିକୁ ଝୁରି 

ଆନମନା ହୋଇ ରହିଛି ଅନେଇ

 ଆସିବୁ କେବେ ଲୋ ଫେରି ॥