ଘର

ବଡ଼ ବଡ଼ କୋଠା ତୋଳିଦେଲେ ଖାଲି

ହୋଇଯାଏ ନାହିଁ ଘର

ଘରସେ ଅଟଇ ରୁହନ୍ତି ଯେଉଁଠି

ମିଳିମିଶି ପରିବାର ।

ନଥାଉ ପଛକେ ଡାଇନିଂ ଗୋଟିଏ

ଆସନେ ବସିଲେ ହେଲା

ଶ୍ରଦ୍ଧାରେ ଯେଉଁଠି କଅଁଳା ଶିଶୁଟି

ହୋଇ ପାରୁଥିବ ଗେହ୍ଲା ।

ଭୋକ ଲାଗୁଥିଲେ ମାଆ ପାଖେ ପିଲା

କରି ପାରୁଥିବ ଅଳି

ମାଆ ଦେଉଥିବ ମମତାର ଛୁଆଁ

କେବେ ପୁଣି ମିଠା ଗାଳି ।

ଭଲ ଉପଦେଶ ଦେଉଥିବେ ସଦା

ଗୁରୁ ଗୁରୁଜନ ଯେତେ

ଏକମତ ହୋଇ ଚଳୁଥିବେ ସବୁ

ଘରର ମୁରବି ସାଥେ ।

ଘର ଅଟେ ସେହି ଯାହାର ପ୍ରାଚୀର

ସ୍ନେହ ମମତାରେ ଗଢା

ଘର ନୁହେଁ ତାହା କିଣି ରଖିଦେଲେ

ବଡ଼ ବଡ଼ ଗାଡି ଘୋଡା ।