ଈଶ୍ୱର

ଦେଖିନାହିଁ କେବେ ଈଶ୍ୱରଙ୍କୁ ମୁହିଁ

ପୂଜିଛି ଅନେକ ଥର

ବିନା ପୂଜାରେ ବି ପିତାଯେ ମୋହର

ମୋପାଇଁ ପରମେଶ୍ବର ।

ମାତାଯେ ମୋହର ସବୁଠାରୁ ବଡ଼

ମୋପାଇଁ ସାକ୍ଷାତ ଦେବୀ

ମୋ ମନ କଥାକୁ ବୁଝି ସେ ପାରନ୍ତି

ମନେ ଯାହା ଭାବୁଥିବି ।

ପିତା ଚାଲୁଥାନ୍ତି କଣ୍ଟକିତ ପଥେ

ମୋ ପଥେ ବିଛାନ୍ତି ଫୁଲ

ନିଜର କଷ୍ଟକୁ ଛାତିତଳେ ଚାପି

ମାଆ କରୁଥାନ୍ତି ଗେହ୍ଲ ।

ମାତା ସାଜୁଥାନ୍ତି ପୃଥିବୀ ମୋପାଇଁ

କୋଳକୁ ନିଅନ୍ତି ତୋଳି

ପିତା ଯେ ସାଜନ୍ତି ମୋପାଇଁ ଆକାଶ

ମଥାରେ ହାତ ତାଙ୍କରି ।

ଉପାସ ଭୋକରେ ଦିନସେ କାଟନ୍ତୁ

ଅଭାବେ ଥାଆନ୍ତୁ ରହି

ହେଲେ ତାଙ୍କ ଦିନ କଟୁଥାଏ ସଦା

ସୁଖକୁ ମୋହର ଚାହିଁ ।

ପିତାମାତା ମୋର ମୋପାଇଁ ଈଶ୍ୱର

ତାଙ୍କ ପାଦ ପୂଜୁଥିବି

ପ୍ରଭୁଙ୍କ ନାମର ସ୍ମରଣ ଆଗରୁ

ତାଙ୍କ ନାମ ନେଉଥିବି ।

ତାଙ୍କ ପାଦଧୂଳି ମୁଣ୍ଡରେ ମୋ ମାରି

ଚାଲିବି ଜୀବନ ପଥ

ତାଙ୍କ କରୁଣାରେ ଚାଲୁଥିବ ପରା

ମୋର ଏ ଜୀବନ ରଥ ।