ସୁଯୋଗ୍ୟ କୁମର
ସୁଯୋଗ୍ୟ କୁମର
ଉତ୍କଳ ମାଆର ସୁଯୋଗ୍ୟ କୁମର
କାହିଁ ଚାଲିଗଲ ସରଗପୁରୀ
ତୁମ ବଳିଦାନ ସର୍ବଦା ଅକ୍ଷୁର୍ଣ୍ଣ
ଆମ୍ଭେ ହେଉଅଛୁ ଅଧୁନା ଝୁରି ।
ହେ ବୀର ଲକ୍ଷ୍ମଣ ତୁମ୍ଭ ପାଇଁ ଧନ୍ୟ
ହୋଇଥିଲା ମାଟିମାଆ
ଇଂରେଜ ଅଧିନ ମାଆର କଷଣ
ଥରାଇଲା ତୁମ ହିଆ ।
ତୁମ୍ଭେ ଦେଶଭକ୍ତି ଜନନୀର ମୁକ୍ତି
ଆଶା ଭରି ହୃଦୟରେ
ଭରିଦେଲ ଶକ୍ତି ଭୂଲି ମନୁ ଭୀତି
ଜନତାଙ୍କ ପରାଣରେ ।
ବିଦ୍ରୋହ ମଶାଲ ରାଜ୍ୟେ ଜାଲିଦେଲ
ସଂଗ୍ରାମକୁ ଦୃଢ଼ କରି
ଅସହଯୋଗର ଆନ୍ଦୋଳନ ସ୍ୱର
ବୁଣିଦେଲ ରଶ୍ମି ପରି ।
ନେତୃତ୍ବର ସୂତ୍ର ଭ୍ରାତୃତ୍ୱର ଚିତ୍ର
ଜନତାଙ୍କ ମୁଖ୍ୟ ବିତ୍ତ
ନଥିଲେ ବି ଅସ୍ତ୍ର ମୁକତିର ମନ୍ତ୍ର
ଉଚ୍ଚାରିଲେ ତୁଣ୍ଡେ ନିତ୍ୟ ।
ମାତିଲି ଥାନାକୁ ଘେରି କରିବାକୁ
ହୋଇଥିଲ ଅଗ୍ରସର
ରାମେୟା ମୃତ୍ୟୁକୁ ଲଦିଲେ ଦୋଷକୁ
ଜୟ ହେଲା ଛଳନାର ।
ଫାଶୀ ଦଣ୍ଡ ପାଇ ଦୁଃଖୀ ହେଲ ନାହିଁ
ହସି ହସି ପ୍ରାଣଦେଲ
ସାରା ପୃଥିବୀରେ ଯୋଗ୍ୟ ସୁତ ବୋଲି
ଅମରତ୍ୱ ଲଭିଗଲ ।
ହୃଦେ ପୂଜୁଥିବୁ ସଦା ଗାଉଥିବୁ
ତୁମ ବଳିଦାନ ଗୀତି
ମନେ ସ୍ମରୁଥିବୁ ମାନ ଦେଉଥିବୁ
ଭକତିରେ ମଥାପାତି ।