ଅକୁହା କଥା

ଜୀବନରେ କେତେ ଅକୁହା କଥାକୁ

କହି ହୁଏ ନାହିଁ କା' ଆଗେ ଖୋଲି

ହୃଦୟର କଥା ହୃଦୟରେ ଚାପି

ବଞ୍ଚିବାକୁ ହୁଏ ଯେ ଜଳି ଜଳି ।

ନୀରବେ ସହିବା ଭାଗ୍ୟର ଲିଖନ

ନୁହଁଇ ସହଜ ମଣିଷ ପାଇଁ

ନିରୋଳା ବେଳାରେ ବ୍ୟଥା ଯେତେ ସବୁ

ବୋହିଯାଉଥାଏ ଲୋତକ ହୋଇ ।

କିଏ ବା ବୁଝିବ ଅନ୍ତର ବେଦନା

ଅକୁହା କଥାର ମଉନ ଭାଷା

ଆଖି କହୁଥାଏ ଓଠ ତୁନି ରହେ

କାହାକୁ କରିବ କୁହ ଭରସା ।

ମିଛ ହସ ହସି ବଞ୍ଚିବାକୁ ହୁଏ

ମନର ମରମ ନିତି ଲୁଚାଇ

ଲୋକ ଦେଖାଣିଆ ଖୁସିରେ କି ଶାନ୍ତି

ଖୋଜୁଥାଏ ମୁକ୍ତି କ୍ଷଣିଏ ପାଇଁ ।