ଦୁଇଦିନର ଜୀବନ

ଜନମିଛି ଦିନେ ମରିବି ମୁଁ ଦିନେ 

ଧ୍ରୁବ ସତ୍ୟ ଯେ ଅଟଇ 

ଦୁଇ ଦିନକୁ ଜୀବନ ମୋହର 

କିମ୍ପା କରିବି ବଡେଇ  ll 

ଏନ୍ତୁଡ଼ିଶାଳରେ ସ୍ୱାଗତ ମୋହର 

ମଶାଣୀରେ ହେବି ବିଦା 

ପ୍ରିୟ ପରିଜନ ଦୁଇଦିନ କାନ୍ଦିବେ 

ମାଆ କାନ୍ଦୁଥିବ ସଦା  ll 

ସାଙ୍ଗେ ମୋର କେହି ନ ଯିବେ ସେପାରି 

ଏକା ହିଁ ଯିବାକୁ ହେବ 

କିଛି ନେବି ନାହିଁ ଛାଡି ଯିବି ଖାଲି 

ମାନ ଯଶ କୀର୍ତ୍ତି ଲାଭ   ll 

ଏ ଜୀବନ ଯଦି କ୍ଷଣିକ ମାତର 

କିମ୍ପା କରିବି ମୁଁ ଲୋଭ 

ହରିନାମ ଏକା ଅମୂଲ୍ୟ ସମ୍ପଦ 

ଏକାଗ୍ର ଚିତ୍ତରେ ଭାବ  ll