ଆମେ ତ ଭାଗ୍ୟବାନ ପିଲାରେ

ଆମେ ତ ଭାଗ୍ୟବାନ ପିଲାରେ

ବିଜ୍ଞାନ ସାଥେ ନିତି ଖେଳୁରେ

ନାମ ଲେଖାଉ ସ୍ମାଟ ବୟରେ 

ସ୍ମାଟଫୋନଟି ଧରି ହାତରେ ।

ପୁଣି ଯେ ଲାପଟପ ଟାବ୍ଲେଟ

କମ୍ପ୍ୟୁଟର ସାଥେ ନିତି ଭେଟ

ଦୂରଦର୍ଶନେ ମନୋରଞ୍ଜନ

ବିଜ୍ଞାନ ଆମ ଆଖି ଅଞ୍ଜନ ।

ଯୋଗାଯୋଗରେ ଆମ ପୃଥିବୀ

ସଂଙ୍କୁଚିତ ବୋଲି ଅନୁଭବି

ଆନନ୍ଦ ମୁଖରିତ ଜୀବନ

ସଭିଏଁ କରୁଅଛୁ ବରଣ ।

ଅନ୍ତରୀକ୍ଷରେ ଉଡ଼ି ବୁଲୁଛୁ

ପାଣିରେ ବୁଡ଼ି ମୋତି ଖୋଜୁଛୁ

ମାଟି ତାଡ଼ି ପେଟ୍ରୋଲ ଡିଜେଲ

ଜଗତ ହିତେ ତାହା ଅମୂଲ ।

ବିଦ୍ୟୁତର ସଫଳ ଦାନରେ

ଅଛୁ କେତେ ସୁଖ ସୁବିଧାରେ

ପଙ୍ଖାଠାରୁ ଏ. ସି. ପରଯ୍ୟନ୍ତ

ପୁଣି ଜଗତକୁ ଆଲୋକିତ ।

ରେଳଠୁ କଳକାରଖାନାଦି

ଚାଳନା ଏହାର କାରସାଦି

ବିଜ୍ଞାନର ଦାନ ଏ ବିଦ୍ୟୁତ

ଅତୁଳନୀୟ ତା'ର ମହତ ।

ଐଶ୍ବର୍ଯ୍ୟମୟ ଅଟ୍ଟାଳିକାରେ

ବସବାସ କରୁ ହରଷରେ

ଯେତେବେଳେ ଯା' ମନ ଖୋଜଇ

ହାତ ପାହାନ୍ତାରେ ତା' ମିଳଇ ।

ବିଜ୍ଞାନ ଉପକରଣେ ଚାଷୀ

ଖୁସିରେ ଅଛି ଧରାକୁ କର୍ଷି

ତୈୟାର ନାନା ଖାଦ୍ୟ ବ୍ୟଞ୍ଜନ

ମନ ପୂରଇ କରି ଭୋଜନ ।

ଯେତେ ବୈଜ୍ଞାନିକ ଉଦ୍ଭାବନ

ମୋହିତ କରେ ପ୍ରତି ପରାଣ

ଚିକିତ୍ସା କ୍ଷେତ୍ରର ଅବଦାନ

କରଇ କେତେ କ୍ଷତ ପୂରଣ ।

କରି ଅଙ୍ଗର ପ୍ରତିରୋପଣ

ଆମକୁ ଦିଏ ନବ ଜୀବନ 

ଔଷଧ ଆଦି ଉପଚାରରେ

ରୋଗ ପ୍ରତିରୋଧ ହୋଇ ପାରେ ।

ଜୀବନ ଚିତ୍ରେ ବିଜ୍ଞାନ ଛାପ

ଆହା ! କେଡ଼େ ସୁନ୍ଦର ତା' ରୂପ

ଉଡ଼ଇ ଆମ ମନ ଗଗନେ

କୋଳେଇ ତାହାକୁ ପ୍ରତିକ୍ଷଣେ ।

ଏ ମାଟି କୋଳେ ଯେତେ ଜନ୍ମିଛୁ

ତାକୁ ଛୁଇଁ ଶପଥ ନେଉଛୁ

ରହିବୁ ସବୁଥିରେ ଆଗୁଆ

ହସାଇ ଚାଲୁଥିବୁ ଦୁନିଆ ।

ନବ ପ୍ରେରଣା ଉନ୍ମାଦନାରେ

ହୃଦୟ ଭରୁଥିବୁ ଜ୍ଞାନରେ

ସକଳେ ଭରି ଖୁସି ଅପାର

ସୁଖେ ତୋଳୁଥିବୁ ନିଜ ଘର ।

ଆଉ ପଛକୁ କେବେ ନଚାହିଁ

ଅନୁଧାବନ ପଥରେ ରହି

ନୂଆ ନୂଆ ସପନ ପୂରଣେ

ଚେଷ୍ଟିତ ଥିବୁ ସଦା ଜୀବନେ ।

ଗୁରୁ ଗୁରୁଜନ ଶୁଭାଶିଷ

ମଥାରେ ବୋଳି ଥିବୁ ହରଷ

ତାଙ୍କରି ବିଶ୍ବାସ ପ୍ରେରଣାରେ

ପ୍ରଗତି ତୋଳୁଥିବୁ ହାତରେ ।

ବିଭୁଙ୍କ କରୁଣାର ବରଷା

ସଫଳ କରିବ ସବୁ ଆଶା

ସଫଳକାମୀ ନାମ ଲେଖାଇ

ପାରିବୁ ଜୀଇଁ ପରା ଏ ମହୀ ।।