STORYMIRROR

Binodini Dash

Others

4  

Binodini Dash

Others

ଅଗସ୍ତି ଋଷି

ଅଗସ୍ତି ଋଷି

1 min
9



ଆମ ଦେବଭୂମି ଭାରତ ଦିଶଇ

ଆକୃତିରେ ଋଷିପ୍ରତିମ ସମ

କୋଳେ ଧରି ଅଗଣିତ ମୁନିଋଷି

ପରିଚିତି ଏକ ପୁଣ୍ୟର ଧାମ ।


ତା' ବୁକୁରେ ଜନ୍ମି ସାଧନା ବଳରେ

ଆକାଶେ ସପ୍ତର୍ଷିମଣ୍ଡଳେ ସ୍ଥାନ

ତୃତୀୟେ ଅଛନ୍ତି ପୁଲସ୍ତ୍ୟ ମହର୍ଷି

ତାଙ୍କ ପୁତ୍ର ଅଗସ୍ତି ଋଷି ଜାଣ ।


ଜନମ ବୃତ୍ତାନ୍ତ କି ଚମତ୍କାର

ପୁରାଣ କରିଛି ବର୍ଣ୍ଣନା ଯା'ର

ଯଜ୍ଞକୁମ୍ଭେ ରେତ ମିତ୍ର ବରୁଣଙ୍କ

ପଡ଼ିବାରୁ ଜନ୍ମ ହୁଏ ତାଙ୍କର ।


ଦେଖି ନୃତ୍ୟରତା ରୂପସୀ ଉର୍ବଶୀ

ଆଦିତ୍ୟଙ୍କ ଯଜ୍ଞ ସ୍ଥଳରେ ଋଷି

କାମବଶେ ରେତ ହେବାରୁ ସ୍ଖଳିତ

ହୋଇଲା ପତିତ ଯଜ୍ଞକଳସୀ ।


ବ୍ରହ୍ମତେଜ ବଳେ ଭାଙ୍ଗିଲା କଳସୀ

ଜନମ ହୋଇଲେ ଋଷି ଅଗସ୍ତି

ସେହି ଦିନୁ ବହି କୁମ୍ଭଜ ନାମକୁ

ବଢାଇଲେ ନିଜର ପରିଚିତି ।


ଏକଦା ସ୍ବର୍ଗକୁ ଗମନ କାଳରେ

ଦେଖିଲେ ଓଲଟା ଝୁଲନ୍ତା ନର

ବୋଇଲେ ସଭିଏଁ ଅଗସ୍ତି ପୂର୍ବଜ

ଅନ୍ତ ନାହିଁ ଦୁଃଖ ଦୁର୍ଦ୍ଦଶାର ।


ଥିବା ହେତୁ ଅବିବାହିତ ଅଗସ୍ତି 

ପାଣି ଦେଇ କିଏ କରିବ ମୁକ୍ତ

ଅନୁତାପ କରି ସେହି ଦିନଠାରୁ

ଖୋଜିଲେ କନ୍ୟା ବିବାହ ନିମିତ୍ତ ।


ବାଙ୍ଗରା ଥି

ବାରୁ କନ୍ୟା ମିଳିଲାନି

ଲୋପାମୁଦ୍ରାଙ୍କୁ ସେ ମନ୍ତ୍ରେ ଭିଆଇ

ବିଦର୍ଭ ରାଜନେ କରି ସମର୍ପଣ

ବିବାହ କରିଲେ ତାହାଙ୍କୁ ଯାଇ ।


ଧିର୍ଦ୍ୟାସୁ ନାମରେ ଜନ୍ମି ଏକ ପୁତ୍ର

ପୂର୍ବଜମାନଙ୍କୁ ଦେଲା ସେ ମୋକ୍ଷ

ସ୍ବର୍ଗକୁ ଗମନ ତାଙ୍କ ପିତୃଗଣ

ପାଳନ ସେଦିନୁ ପିତୃପକ୍ଷ ।


ଗର୍ବେ ରୋଧ କରିବାରୁ ତପନଙ୍କ

ଗତିପଥ ଶିଷ୍ୟ ବିନ୍ଧ୍ୟାଞ୍ଚଳ

ପାଦେ ଚାପି ତାକୁ ଚୂର୍ଣ୍ଣ ଅହଂକାର

କେବଳ ନିଜର ତପସ୍ୟା ବଳ ।


ଚଳୁକେ କ୍ଷେପି ସେ ସାତ ସିନ୍ଧୁ ଜଳ

ଅସୁର ନିଧନେ ଦେବଙ୍କ ବଳ

ସବୁଜିମାମୟ କରିଲେ ଧରଣୀ

ଭରି କମଣ୍ଡଳୁ କାବେରୀ ଜଳ ।


ରାକ୍ଷସ ଜନ୍ମରୁ କରିଲେ ଉଦ୍ଧାର

ଆତାପି, ବାତାପି ଦୁଇଟି ଭାଇ

ତାଙ୍କ ଯୋଗୁଁ ବିଷ୍ଣୁ ଶିବ ଦରଶନ

ହରିଶଙ୍କର ରୂପେ ମର୍ତ୍ତ୍ୟ ଭୂଇଁ ।


ଋକ୍ ବେଦର ସେ ରଚୟିତା ପୁଣି

ଅଗସ୍ତି ସଂହିତା ତାଙ୍କର କୀର୍ତ୍ତି

ତେଜସ୍ବୀ ବିଜ୍ଞାନୀ ସେ ଅଗସ୍ତି ଋଷି

ମରତ ଜାଳଇ ଅଖଣ୍ଡ ଜ୍ୟୋତି ।


ଋଷି ନାମେ ଶ୍ରେଷ୍ଠ ନାମକୁ ଧାରଣ

କରି ରହିଥିବେ ଭୂବମଣ୍ଡଳେ

ଅନନ୍ତ ଅନନ୍ତକୋଟି ପ୍ରଣିପାତ

ଜଣାଏ ଋଷିଙ୍କ ପଦ ଯୁଗଳେ ।





Rate this content
Log in