ମନେ ପଡ଼ନ୍ତି ଖୋକାଭାଇ

ଉଡ଼ିଗଲେ ଗେଣ୍ଡାଳିଆ ଝାଡ଼ି ଦେଲେ ପର l

ମନେ ପଡ଼ିଯାଏ ଆଜି ଖୋକାଭାଇ ମୋର ll

ଏ ତ କଳି କାଳ ରୀତି ବିପରୀତ ଭାଇ l

ଦଶରାବଜାରେ ଗୀତ ଗାଏ ଖୋକା ଭାଇ ll 

କଟକେ ବଗିଚା ନାମ ଅଟେ ତ୍ରିକୋଣିଆ l

ଢୁଲ ପାରେ ପାରେ ବଜା ଆରେ ଵଜନିଆ ll

ସକାଳର ଗାଡ଼ି ଗଲା କଳା ଧୂଆଁ ଛାଡ଼ି l

ମହାନଦୀରେ ନଉକା ଦେଇଛି ମୁଁ ଭିଡ଼ି ll

ହାତେ ଧରି କାତ ମୁହିଁ ମୁଣ୍ଡେ ଭିଡ଼ି ଠେକା l

ନନୀ ଦେଖେ ହୀରାକୁଦେ କଟକିଆ ଟୋକା ll

ରକତ ଟଳ ମଳକୁ ଖଇର ପାଞ୍ଚ ପଳ l

ସାଧବ ଆଣିଛି କେଉଁ ଦେଶରୁ ଏ ଫଳ ll

ସାବିସାବି ରାବି ତୋତେ ନାଲିପାନ ବିବି l 

ସଵାରୀ ଚାଲଇ ଧୀରେ ତୋର କଥା ଭାବି ll

ଷଣ୍ଢ ଛତ୍ର ବଜାରରେ ପଶିଲା ବାଉଳି l

ମାରୁଆଡ଼ି ଖୁଆଇଲେ କାବୁଲି କଦଳୀ ll

ଘାଇଁ ଘାଇଁ ନଳ ବୁଲେ ନୂଆ କ୍ୟାପିଟାଲ l

କେଦାରଗଉରୀଠାରେ ତୁମେ ପ୍ରେମ କଲ ll

ନଦୀଟି ଅଳସ କନ୍ୟା ତୀର ତାର ତନ୍ଦ୍ରା l

ଗ୍ରାମ ନାମ ସ୍ୱପ୍ନପୁରୀ ପ୍ରୀୟା ତୁମ ଚନ୍ଦ୍ରା ll

ଅକ୍ଷୟର କ୍ଷୟ ନାହିଁ ଅକ୍ଷୟ ମହାନ୍ତି l

ତୁମ ନାମରେ ଓଡ଼ିଆ ହସନ୍ତି କାନ୍ଦନ୍ତି ll

ଲେଖିଲ ଗାଇଲ ପୁଅ ମୋ କଳା ଠାକୁର l

କେଣେ ଘେନି ଯାଉଅଛ ଜଗନ୍ନାଥେ ମୋର ll

ଓଲଟ ବ୍ରୁକ୍ଷେ ଖେଳୁଛି ଲୋଟଣିଆ ପାରା l

ତୁମ ନାମରେ ବାଜୁଛି ସଙ୍ଗୀତ ନାଗରା ll

ହୁଣ୍ଡୀ ପକାଉଛି ମନେ ଗୁଣ୍ଡି ପାନ ଖାଇ l

ଲଚକମାଣୀ ଉଡ଼ୁଛି କାନି ଖାଇ ଖାଇ ll

ସମର୍ପିଦେଇ ତୁମେ ହେ ପାଇ ଅଛ ସର୍ବ l

ଖୋକାଭାଇ ତୁମକୁ କି ଏ ଜାତି ଭୁଲିବ ll