କନିଷ୍ଠ ସଂଗ୍ରାମୀ ବାଜି ରାଉତ

ଵର୍ଷା ଭିଜା କାଳରାତ୍ରୀ ଗରଜୁଛି 

ଫୁଲି ଉଠିଅଛି ବ୍ରାହ୍ମଣୀ ପାଣି l 

ଉଛୁଳା ବ୍ରାହ୍ମଣୀ ଘାଟ ଜଗି ଅଛି 

ବାଜିଆ ବାଳକ ବୀର ଅଗ୍ରଣୀ ll

ସିଂହର ବଳ ବୁକୁରେ ଭରା ତା

ଟକମକ ହୋଇ ଫୁଟେ ରକତ l

ଏ ଜାତି କୋଣାର୍କ ଧରମପଦ ସେ  

ବାର ବର୍ଷ ବାଜି ମାତୃ ଭକତ ll

ଉତ୍କଳ ମାତାର ଅଲିଅଳ ଧନ 

ନରମ ହାତେ ତା କଠୋର କାତ l

କର୍ମ ସାଧନେ କୁରୁକ୍ଷେତ୍ରେ ଆଜି 

ଅଭିମନ୍ୟୁ ସାଜି ମେଲିଛି କାତ ll

ଗୋରା ଶାସକର ଘୃଣ୍ୟ ଚକ୍ରାନ୍ତେ 

ପ୍ରତାରିତ ଆଜି ଭାରତ ମାତ l

ସଂଗ୍ରାମ କରିଛି ଜୀବନର ପଣ 

ହୋଇଯାଉ ପଛେ ମହାଭାରତ ll

ଫିରୀଙ୍ଗୀ ଫଉଜ ଗରଜି ଉଠିଲା 

ପାରିକର ନଦୀ ଆରେ ତୁରନ୍ତ l

ସେ କି ଜାଣିଥିଲା ତୁଠରେ ପ୍ରହରୀ 

କଳିଙ୍ଗ ବୀର ସେ ବାଜି ରାଉତ ll

ବାଜିଆ ବୋଇଲା ପାରି କରିବିନି 

ତୁମେ ଗୁଡ଼ା ଅଟ ନିର୍ଧୁମ ଖଣ୍ଟ l

ଉତ୍କଳ ମାତାର ସ୍ତନ ମୁଁ ପିଇଛି ତା'

ସେବା ମୋହର ଜୀବନ ବ୍ରତ ll

ଗୁଡ଼ୁମ ଗୁଡ଼ୁମ କମାଣ ଗର୍ଜିଲା  

ରକତେ ରଞ୍ଜିତ ବ୍ରାହ୍ମଣୀ ସ୍ରୋତ l

ରକତେ ଲେଖିଲା ଜୀବନର ଗାଥା

ବୀର ବାଳକ ସେ ବାଜି ରାଉତ ll

ରହିଗଲା ଗାର ଜାତି ଇତିହାସେ 

ରହିଗଲା କାଳ କାଳକୁ କଥା l

ବାଜିଆ ରାଉତ ଜୀବନ ଦେଲା ସେ 

ନୋଇଁଲା ନାହିଁ ଟିକିଏ ମଥା ll

ଗଲାଣି ସେ କାଳୁ କେତେ ପାଣି ବହି 

ଅବିରତେ ବହେ ବ୍ରାହ୍ମଣୀ ସ୍ରୋତ l

ଇତିହାସ ଅଙ୍କେ ଅଙ୍କିତ ତା' ନାଆଁ 

କନିଷ୍ଠ ସଂଗ୍ରାମୀ ବାଜି ରାଉତ ll