मुकुंदा
मुकुंदा
कोठे लपून आता बसलास रे मुकुंदा
का दानवा पुढे तू हरलास रे मुकुंदा--१
कित्येक द्रौपदींची अब्रू लयास जाता
पुरवून कापडे का दमलास रे मुकुंदा--२
सांगीतली जरी तू गीता धनंजयाला
दलदल कलीयुगाची फसलास रे मुकुंदा--३
आता न धर्म कोठे सांगावयास उरला
होणार काय तू जर नसलास रे मुकुंदा--४
करतोस गोकुळीं का अद्याप रासक्रीडा
गोपींमध्येच का तू रमलास रे मुकुंदा--५
आवाज बासरीचा कानावरी न येतो।
आम्हावरी कशाने रुसलास रे मुकुंदा--६
प्राण्यांसमान जगणे पाहून माणसाचे
उपहास दावण्या का हसलास रे मुकुंदा--७