उठ तरुणा

उठ तरुणा, नव्या दमाने या देशाची साद तुला ।

या देशाच्या संस्कृतीचे रक्षण करणे आहे तुला ।।

आठव ते बलिदान वीरांचे देशासाठी प्राण दिले ।

गोऱ्यांच्या जुलमी बेड्यांतून ज्यांनी तुला स्वातंत्र्य दिले ।।

झेलल्यात त्या गोळ्या ज्यांनी हसतमुखाने छातीवर ।

ओवाळून टाकिला आपुला प्राण ज्यांनी या मातीवर ।।

त्या वीरांचे रक्त तुझ्याही धमन्यांमधुनी सळसळते ।

अत्याचार अन्याय बघून का चित्त तुझे ना खवळते? ।।

सीमेच्या पलीकडून अजूनही शत्रूचा हल्ला होतो ।

शीर हाती घेऊनिया सैनिक सीमेचे रक्षण करतो ।।

सीमेचे नच भीती बाळगू ओळख आतील शत्रूला ।

वासना, षडविकार त्यागुन जपावे मानव धर्माला ।।

भ्रष्टाचाराने आतून केले पोकळ इथल्या संस्कृतीला ।

वासनांधता फार वाढली सोयरसुतक नच कोणाला ।।

नारीचे जिथे पूजन होते, तिथे देवता वास करी ।

जपण्या ऐशा संस्कृतीला संकल्प करुनि ध्यास धरी ।।