मीरा दंग झाली
मीरा दंग झाली
मारवाड देशी । राजपुता घरी ।।
जन्म घेते परी । मीरा राणी ।।१।।
बालपणी तिने । पाहिली वरात ।।
पुसते घरात । पती कोण? ।।२।।
आई उत्तरली । कृष्ण तुझा पती ।।
मीरा अल्पमती । ध्यानी ठेवी ।।३।।
लग्न झाल्यावर । सासरला गेली ।।
मूर्ती संगे नेली । कन्हैयाची ।।४।।
पतीशी ना कधी । झाली रममाण ।।
केले समर्पण । कृष्णापायी ।।५।।
जहराचा प्याला । राणाजीने दिला ।।
तिने पचविला । हरी कृपे ।।६।।
कृष्ण भजनाचा । लागलासे छंद ।।
गोविंद गोविंद । मुखी सदा ।।७।।
हातामध्ये वीणा । पायात पैंजण ।।
मुखात भजन । श्रीकृष्णाचे ।।८।।
आदर्श प्रमाण । तिचे आचरण ।
भक्तीचे दर्शन । भक्तांसाठी ।।९।।