घे विसावा क्षणभर
घे विसावा क्षणभर
कणभर सुखासाठी
झटणे होते मणभर
झटणेच आहे जिणं
घे विसावा क्षणभर.
धारा घामाच्या
वाहतात भाळावर
बोटाने घे टिपून
घे विसावा क्षणभर.
भाकरीचं ओझं नित्य
घेतलेले माथ्यावर
शमव तहान थोडी
घे विसावा क्षणभर.
रस्ता संपत नाहीच
धोका उभा वळणावर
दगड मैलाचा पाहून
घे विसावा क्षणभर.
अपेक्षांचं गाठोडं
ज्याच्यात्याच्या उरावर
उरक हवा कामाचा तसा
हवा विसावा क्षणभर.