અખિલ બ્રહ્માંડમાં રે...!

નથી કોઈ હરિની હારોહાર અખિલ બ્રહ્માંડમાં રે.

જયાં બુદ્ધિ નહિ પહોંચનાર અખિલ બ્રહ્માંડમાં રે...

હોય હજારો દોષીને પાપી પસ્તાવે દેતો એ કાપી,

ખુદ હરિ હો આવકારનાર અખિલ બ્રહ્માંડમાં રે...

આવી શરણ જે પોકારે હરિવર એને તો ઉગારે, 

એનું વાત્સલ્ય અનરાધાર અખિલ બ્રહ્માંડમાં રે...

અંતર જેનું હરિને ઝંખે બેસાડે એ નિજના અંકે,

સાંભળતાં ભક્તના પોકાર અખિલ બ્રહ્માંડમાં રે...

શ્વાસે શ્વાસે સ્મરણ એનું ઉર પણ ધબકારે જેનું, 

છોડી આવે એ કામ હજાર અખિલ બ્રહ્માંડમાં રે...

હરિવર હેતમાં સૌથી સવાયા દીધી માનવ કાયા,

સમય સાચવી લે કિરતાર અખિલ બ્રહ્માંડમાં રે...