રામ તમે...!

પિતા વચને રાજ ત્યજનાર રામ તમે.

અવધ તજી વનગમન કરનાર રામ તમે.

કૈકયી લેણાં વચને ભરતને ગાદી માંગી,

વર્ષ ચૌદ વનવાસ સ્વીકારનાર રામ તમે.

મળી વનવાસી સીતા લખન સંગ રહ્યા,

સંગ ૠષિમુનો સદા કરનાર રામ તમે.

પ્રેમ દેખી કેવટનો પદ પ્રક્ષાલન ગંગાતીરે,

ભીલ કીરાતને ગળે લગાડનાર રામ તમે.

સુવર્ણ મૃગ પામવા દૂરસુદૂર ગયા પ્રભુ,

માયાવી મારીચને હણનાર રામ તમે.

ભીલનારી અધમ શબરી પંપાતીરે રહે,

જૂઠાં બોર એના આરોગનાર રામ તમે.

થઈ મિત્રતા સુગ્રીવ સંગાથે મારુતિથી,

 વાલીને એક જ બાણે મારનાર રામ તમે.

હણ્યો દશાનન એકત્રીસ બાણ ખેંચીને,

રામરાજ્ય અવધમાં સ્થાપનાર રામ તમે.

એકપત્ની, એકવચન આદર્શ તમારો ને,

થયો સર્વત્ર તમારો જયજયકાર રામ તમે.