ତୁମେ ଶୋଇବାପରେ.........

  ସକାଳ ଦଶ ଘଟିକା ! ସମସ୍ତଙ୍କର ସକାଳ ପ୍ରାୟତ ୫ – ୬ ଘଟିକାରେ ହେଉଥିବାବେଳେ ତୁମର ସକାଳ ଦଶ ଟାରେ ଆରମ୍ଭହୁଏ । ଉଠୁଉଠୁ ହାତରେ ଫୋନ ଧରି ବସିଯାଅ ସେଜ ଉପରେ । କିଛି ସମୟର କେଞ୍ଚାକେଞ୍ଚି ପରେ ମନକୁ ମୋ କଥା ଆସିଲେ କଲ ଗୋଟାଏ କରିଦିଅ ତରବର ହୋଇ, କାଳେ ରାଗିନଥିବତ ମୋ ଉପରେ ! 

  ଏପଟେ ତୁମ ଫୋନକୁ ଚାହିଁ ବସିଥିବା ଚାତକିଟି ଅଭିମାନରେ ବେଳେବେଳେ କଲ ରିସିଭ୍ ନକରି ଫୋନକୁ ଚାହିଁ ରହିଥାଏ ତ, କେତେବେଳେ ମିଠା ପଦିଏ କଥା କହିବାକୁ କଲକୁ ରିସିଭ୍ କରିନିଏ । ସତ ରାଗ ଅଭିମାନ ପରେ ବି କଥା ହେବା ବନ୍ଦ୍ ହୁଏ ନାହିଁ । ପାଗେଳିଟି କହିଯାଏ ନିଜ ମନ କଥାକୁ । ମନରେ ରଖିଥିବା ସବୁ ରାଗକୁ ତୁମ ଉପରେ ବରଷିଦିଏ । ତୁମେ ବି ଚୁପ୍ ଥାଅ । ତୁନି ହୋଇ ତା' କଥାକୁ ଶୁଣୁଥାଅ ତ କେତେବେଳେ ତାକୁ ବୁଝାଇବାକୁ ଚେଷ୍ଟାକର । ହେଲେ ପାଗଳି ମନ କି ବୁଝିବ ? ସେ ତା'ର ହକ୍ ଜତାଇଚାଲେ । ହୁଏତ ନୂଆ କରି ଭଲପାଇବା ଆରମ୍ଭ କରୁଛି ତମଠୁ । 

  

  କଥା ହେବା ଭିତରେ ତୁମ ପାଖକୁ ଆସୁଥିବା ଅନ୍ୟ କାହାର କଲ ଭଲ ଲାଗେନି ଶୁଣିବାକୁ । ହେଲେ କ'ଣ କରିବା ? ଦୁନିଆଁରେ ବଞ୍ଚିବାକୁ ହେଲେ କାମତ କରିବାକୁ ହେବ ଏକଥା ବୁଝିଇଚାଲ ତୁମେ । ଭରଷା ପାଏନି କଥାକୁ, କିନ୍ତୁ ବିଶ୍ୱାସରେ ଶୁଣିବାକୁ ହୁଏ । ଶୁଣିଛି ବିଶ୍ୱାସହିଁ ସବୁକିଛି, ଏକଥା ତୁମେବି ବୁଝାଅ ମୋତେ । ହଁ ରାଗ ଆସେ ତୁମ ଉପରେ । ସେଥିପାଇଁ ତ ଝଗଡା କରେ ତୁମ ସହ । କିନ୍ତୁ ତୁମେବି ବେଶ୍ କମ୍ ସମୟ ମଧ୍ୟରେ ମୋତେ ଭଲରେ ବୁଝିବାକୁ ଚେଷ୍ଟା କରୁଛ । 

  ତେବେ ସକାଳୁ-ସକାଳୁ ଏମିତି କିଛି ଖୁସି ଗପ, ରାଗରୁଷାରେ ଘଣ୍ଟାଏ-ଦେଢ ଘଣ୍ଟା ସମୟ କେତେବେଳେ ଯେ ଅତିକ୍ରମ କରିଯାଏ ଜଣାପଡେନି । ତା'ପରେ ଆରମ୍ଭ ହୋଇଯାଏ ପୁଣି ତୁମର ସେଇ କାମ । କ'ଣ କହିବି ଭାବିଲାବେଳକୁ ତୁମେ କଲ କାଟି ବାହାରିଯାଅ ନିଜ କାମରେ । ମୁଁ ବି ସମୟ ଦିଏ ତୁମକୁ । ଦିନର ବ୍ୟସ୍ତତା ଭିତରେ ତୁମେ ମୋତେ ସମ୍ପୂର୍ଣ୍ଣ ଭାବରେ ଭୁଲିଯାଅ ।

  କାମ ଆଗରେ ମୁଁ କିମ୍ବା ମୋ କଥା ତୁମର ମନେପଡେନି । ତୁମର କାମ କିପରି ଚାଲିଛି ? ଖାଇଲଣି କି ନାହିଁ ଫୋନ କରି ପଚାରିବାକୁ ଭାବେ, କିନ୍ତୁ କାଳେ ତୁମର ମୋ କଲ ପାଇଁ କାମରେ କୌଣସି ଅସୁବିଧା ହେବ ସେଥିପାଇଁ ମନକୁ ବୁଝାଇଦିଏ । ଅପେକ୍ଷା କରିଥାଏ ସେଇ ସନ୍ଧ୍ୟାକୁ । ଭାବେ ହଁ ଆଉ ଟିକେ ପରେ ତୁମ କାମ ସରିଯିବ ଆଉ ତୁମେ ମୋତେ ନିଜେ ଫୋନ କରିବ । ହେଲେ ଭାବନା କେବେ ସତ ହୁଏନା । ମୋ ଭାବନା ବି ସେମିତି ଅଧାରେ ରହିଯାଏ । ଏମିତି କଟିଯାଏ ସନ୍ଧ୍ୟାବେଳ । 

  ସନ୍ଧ୍ୟା ଯାଇ ରାତିହୁଏ, କିନ୍ତୁ ତୁମର ଦେଖା ମିଳେନି । ନାଁ କୌଣସି କଲ, ନାଁ କିଛି ମେସେଜ . ଏମିତି ଲାଗେ ଯେମିତି ମୁଁ ତୁମ ମନରୁ ହିଁ ଡିଲିଟ୍ ହେଇସାରିଛି। ଏତେ ସବୁ ଭାବନାକୁ ମନରେ ରଖି ମୁଁ ଚୁପ୍ ରହିଯାଏ । ମୋର କାମ ସାରି ରାତି ଏଗାର ଭିତରେ ଶୋଇବାକୁ ବାହାରିପଡେ ମୁଁ । ହେଲେ ନଜର ଥାଏ ତୁମ ହ୍ୱାଟସଆପ ଉପରେ । କାଳେ ମୋ ପାଇଁ କିଛି ମେସେଜ ଥିବକି ? କିନ୍ତୁ କିଛି ନଥାଏ । ଶେଷରେ Good Night ମେସେଜ କରି ମୁଁ ଶୋଇଯାଏ ।

  ଆଖି ଲାଗି ଆସିଲାବେଳକୁ ତୁମର ଭାବନା ମୋତେ ଶୋଇବାକୁ ଦିଏନି । ଫୋନ ନେଇ ଦେଖିଲାବେଳକୁ ତୁମର କଲ. ମେସେଜ୍ ବି ଥିବ, ବାବୁ କ'ଣ ଶୋଇଗଲୁଣିକି ? ମୁଁ ଏବେ ଫେରିଲି ଘରକୁ, ବହୁତ୍ ଟାୟାର୍ଡ୍ ଅଛି କିଛି ମିଠା କଥା କହିବୁ ? ସଙ୍ଗେସଙ୍ଗେ ହ୍ୱାଟସଆପ ଖୋଲି ଦେଖେତ ତୁମର ସେ ଆଇ ଲଭ୍ ୟୁ ମେସେଜ, ମୋତେ ପଢିବାକୁ ଭଲ ଲାଗେ । ମୁଁ ଭୁଲିଯାଏ ସବୁ ରାଗ । ସବୁ ରାଗକୁ ପାଶୋରି ଦେଇ ପ୍ରେମ ଗପ କରିବା ଆରମ୍ଭ କରିଦିଅନ୍ତି ଆମେ ଦୁହେଁ । 

  ଜଣାନାହିଁ କି ଯାଦୁ ଜାଣିଛ ତୁମେ ? ତୁମ ସହ କଥାହେଲେ ମୁଁ ସବୁକିଛି ଭୁଲିଯାଏ, କେବଳ ମନେ ଥାଅ ତୁମେ । ତୁମେ ବି ଏହାର ବେଶ୍ ଭଲ ଫାଇଦା ଉଠାଅ ମୋ ପାଖରୁ । କିନ୍ତୁ ଖୁସି ଲାଗେ ମୋ ପାଇଁ ତୁମର ଭଲପାଇବା ଦେଖି । ଜାଣିନି ତୁମେ ସାରା ଜୀବନ ମୋ ସାଥିରେ ରହିବକି ନାହିଁ ? କିନ୍ତୁ ମନ ଚାହେଁ ତୁମେ ସେମିତି ଥାଅ ସବୁବେଳେ । ତୁମର କେଆର୍ ନେବାକୁ ଭଲଲାଗେ ମୋତେ । ବେଳେବେଳେ ମୋର ରାଗ ଏତେ ବଢିଯାଏ ଯେ, ମୋତେ ବୁଝାଇବା ଚକରରେ ତୁମେ ଖାଇବାକୁ ଭୁଲିଯାଅ । 

  ଦିନସାରାର କାମର ଥକାପଣରେ ତୁମକୁ ଜୋରରେ ନିଦ ଆସୁଥିଲେ ମଧ୍ୟ, ମୁଁ କାଳେ ରାଗିବି ଭାବି କିଛି କୁହନି ମୋତେ । ସେମିତି କଥା ହୋଇଚାଲ ମୋ ସାଥିରେ । କଥା ତ ନୁହେଁ ! ରାତିରେ ତୁମ ସହ ଭିଡିଓ ଚାଟ୍ କରିପାରିବିନି ବୋଲି ତୁମେ କଲ କରି ଚାହିଁ ରହିଥାଅ ତୁମ କଥାର ଉତ୍ତରକୁ । ମୁଁ ଟାଇପ୍ କରି ତୁମ କଥାର ଉତ୍ତର ଦିଏ । ଆଉ ମେସେଜ ପାଇବାପରେ ତୁମେ ପୁଣି କହିଚାଲ, ଆଉ ମୁଁ ଉତ୍ତର ଦେଇଚାଲେ । ଏତେ କଥା ଭିତରେ ବି ତୁମକୁ କେତେବେଳେ ନିଦ ଆସିଯାଏ ମୁଁ ଜାଣି ପାରେନି । 

  ବେଳେବେଳେ ତ ତୁମେ ମୋତେ ଆଗୁଆ ବି କହିଦିଅ ଯଦି କଥା ହେଲାବେଳେ ମୁଁ ଶୋଇପଡିଲି ତେବେ ତୁ ରାଗିବୁନି । ମୁଁ ସେମିତି କଥା ହେଇଚାଲେ । ତୁମେ ମୋତେ କିଛି କହ.....କହି ଯଉ ଶୋଇପଡ ମୋତେ ଭାରି ରାଗ ଲାଗେ । କିନ୍ତୁ କିଛି କହିପାରେନି । କହିବି କାହାକୁ ଯେ, ତୁମେ ତ ଶୋଇ ଯାଇଥାଅ । ମୁଁ କିଛି ସମୟ ଅପେକ୍ଷା କରିବାପରେ ତୁମକୁ କଲ କରିଦିଏ । କିନ୍ତୁ ତୁମେ ନିଦରେ ମୋ କଲ ରିସିଭ୍ ତ କରିଦିଅ ହେଲେ, କଥା ହୁଅନି । 

  ଅନଲାଇନ ଦେଖାଉ ଦେଖାଉ କେତେବେଳେ ଯେ ଲାଷ୍ଟ୍ ସିନ୍ ସୋ କରେ ମୁଁ ଜାଣିପାରେନି । ବାରମ୍ବାର ଅନଲାଇନ - ଅଫଲାଇନ୍ ହେଇ ହେଇ ଶେଷରେ ନେଟ୍ ଅଫ୍ କରିଦିଏ । ଖାଇବା ପରର ନିଦ୍ରା ଭାଙ୍ଗିଗଲେ ଆଉ ମୁଁ ଶୋଇ ପାରେନା । ଏକଥା କହିନି ତୁମକୁ । କିନ୍ତୁ ସତତ ଏଇଟା ମୁଁ ତୁମ ସହ କଥା ହେବା ପାଇଁ ଶୁଏନାହିଁ । ତୁମେ ସେଠି ଅଚିନ୍ତା ନିଦରେ ଶୋଇଯାଅ, ଆଉ ମୁଁ ଏଠି ବିଛଣାରେ ପଡି ଏକଡ -ସେକଡ ହେଉଥାଏ । କିନ୍ତୁ ଆଉ ନିଦ ଆସେନି । 

  ଗୋଟାଏ ଅଜବ୍ ପ୍ରକାରର ଅନୁଭବ ହୁଏ । ଛାତି ଥରେ, ଆଉ ମୁଁ ଶୋଇପାରେନି । ରାତ୍ରିର ସବୁ ପ୍ରହର ସେମିତି ଚାହିଁ ଚାହିଁ କାଟିଦିଏ । ବେଳେବେଳେ ମନକୁ ଆଶ୍ବସ୍ତି ଲାଗିଲେ ଭୋର୍ ରୁ - ଭୋର୍ ରୁ ନିଦ ଟିକିଏ ଆସିଯାଏ । କିନ୍ତୁ ଆଖିର ନିଦ୍ରାକୁ ଭାଙ୍ଗି ସକାଳୁ ଉଠିବାକୁ ପଡେ । ପ୍ରାୟ ୬.୩୦ ବେଳକୁ ମୁଁ ଉଠିଯାଏ । ଉଠିଲା ପରେ ଫୋନ ନେଇ ତୁମର ଲାଷ୍ଟ୍ ସିନ୍ ଚେକ୍ କରେ । ତୁମକୁ ଅନଲାଇନରେ ନଦେଖି ଫୋନ ରଖି ନିଜ କାମ କରିଚାଲେ । ଏବେ ଠିକ୍ ଦଶ ଟା ତୁମର ଉଠିବା ଟାଇମ୍ . 

  ତୁମକୁ ଜଣାବି ନଥାଏ ତୁମେ ଶୋଇବା ପରେ ମୁଁ କ'ଣ କରୁଥିଲି ? କେବେ କହିନଥିଲି ଆଜି ଲେଖି ଜଣାଉଛି । ଆକୁ ପଢିବାପରେ ମନ ଦୁଃଖ କରିବନି, ଖାଲି ହସିକି ଥରେ ଭଲପାଉଛ ବୋଲି କହିଦେବ ବୁଝିଯିବି ମୁଁ । ଏମିତିବି ତୁମେ ମୋତେ ଆଗରୁ କହିଛ ମୁଁ ତୁମର ସ୍ତ୍ରୀ, ଗାର୍ଲ୍ ଫ୍ରେଣ୍ଡ୍ ନୁହେଁ । ତେବେ ଏତିକିତ ନିଶ୍ଚୟ ମୋ ପାଇଁ କରିବ । ଲଭ୍ ୟୁ......