ସିଆଣା ଝିଅ

'ଶିଉଳି' ଆମର ସିଆଣା ଝିଅ,

ଗରମ ଭାତରେ ଖାଏ ସେ ଘିଅ ।

ସଜନା ଛୁଇଁକୁ କଦଳୀ ଭଜା,

ଖାଇବାକୁ ତାକୁ ଲାଗଇ ମଜା ।

ଘାଣ୍ଟ ତରକାରି-ଡାଲି;

ମାଆଙ୍କୁ ଏ ସବୁ ରାନ୍ଧି ଦେବା ପାଇଁ

ବରାଦ କରେ ସେ ଖାଲି ।

ଆଇଁଷ ଫାଇଁଷ ଦେଖିଲେ ସିଏ,

ହାଣ୍ଡିପରି ମୁହଁ ଫୁଲେଇ ଦିଏ ।

ଦେଲେ ସଜ ଦହି ଛେନାରୁ କିଛି,

କହେ ମୋ ପସନ୍ଦ ଖାଇବା ଅଛି ।

ଖୁସିରେ ଡିଆଁଟେ ମାରି;

ମୁହଁ ହାତ ଧୋଇ କେଡ଼େ ଆନନ୍ଦରେ

ଖାଇବାଟା ଦିଏ ସାରି ।

ସବୁଜ ପରିବା ଖାଇ ସେ ନିତି,

ଦେହରେ ତାହାର ଭରେ ଶକତି ।

ମଗଜରେ ବୁଦ୍ଧି ଗଲାଣି ବଢ଼ି,

ମନେ ରଖୁଅଛି ପାଠକୁ ପଢ଼ି ।

ପଚାରିଲେ ପ୍ରଶ୍ନଟିଏ;

ଅଯଥାରେ ଜମା ଡେରି ନ କରି ସେ

ସଅଳ ଉତ୍ତର ଦିଏ ।