ମନଖୋଲା ହସ

ସୂର୍ଯ୍ୟ ଉଦୟର ପୂର୍ବରୁ ଶୁଭଇ

ପକ୍ଷୀରବ କୋଳାହଳ

ଧୀରେ ଧୀରେ କ୍ରମେ ଫରଚା ଦିଶଇ

ହୁଅଇ ଶୁଭ ସକାଳ ।

ସକାଳ ପ୍ରାରମ୍ଭେ ପଶୁପକ୍ଷୀଗଣ

ସବୁ ମନେ ଖୁସିଥାଏ

ନର ନିଦୁ ଉଠି ନିତ୍ୟକର୍ମ ସାରି

କର୍ମରେ ବାହାରିଯାଏ ।

କର୍ମ ସ୍ୱୟଂ ପରା ଅଟେ ଭଗବାନ

ମନୁଷ୍ୟଠୁ ପଶୁପକ୍ଷୀ

କର୍ମରେ ସକାଳୁ ତତ୍ପର ହୁଅନ୍ତି

କର୍ମ ବିନା ନାହିଁ ମୁକ୍ତି ।

ଚାପଗ୍ରସ୍ତ ହୋଇ ଆଜି ଦୁନିଆରେ

କର୍ମେ ଲାଗି ରୁହେ ନର

ଭୋକ ଶୋଷ ଭୁଲି ଧନ ପଛେ ଧାଇଁ

ଯତ୍ନ ନିଏ ନାହିଁ ତା'ର ।

ଫଳ ଆଶା ରଖି କର୍ମ ଯେ ନକର

ଆଶା ନହେଲେ ପୂରଣ

ମନରେ ନିଶ୍ଚିତ ଆସେ ଅବସାଦ

କାମନା ଦୁଃଖ କାରଣ ।

ସୁଖ ପାଖେ ଦୁଃଖ ଦିନେ ପାଖେ ରାତି

ଖରା ପାଖେ ଅଛି ଛାଇ

ସବୁ ମିଶା ମିଶି ନେଇତ ଜୀବନ

ଜୀବନେ ହାରିବା ନାହିଁ ।

ଦୁଃଖ ଓ ଯନ୍ତ୍ରଣା ଭିତରେ ଖୁସିକୁ

ଖୋଜି ବାହାର କରିବା

ନିଜେ ଖୁସି ରହି ଖୁସିକୁ ବାଣ୍ଟିବା

ଖୁସିରେ ଆମେ ବଞ୍ଚିବା ।

ସ୍ୱାସ୍ଥ୍ୟ ଆମ ପାଇଁ ଅମୂଲ୍ୟ ସମ୍ପଦ

ମନ ଖୋଲା ଯେବେ ହସ

ରୋଗଶୋକ ଦେହୁ ହୋଇଯାଏ ଦୂର

ବଢ଼ଇ ଆମ ଆୟୁଷ ।

ମନ ପ୍ରଫୁଲ୍ଲିତ ଥିଲେ ମନଖୋଲା

ହସ ସ୍ବତଃ ଆସିଥାଏ

ଅଳ୍ପରେ ସନ୍ତୁଷ୍ଟ ରଖିଲେ ମନକୁ

ବ୍ୟକ୍ତି ଆପେ ଖୁସି ରହେ ।