ଏକା ଏକା

ଏକା ଏକା କାମ କଲେ

ନହୁଏ ସହଜ

ଏକା ଏକା ବୁଲିବାରେ

ନଥାଏ ମଉଜ ।

ଏକା ଏକା କହି ଦେଲେ

ହୁଏନି ସେ ବଡ଼

ଏକା ଏକା ଜୟ କରି

ପାରେନି କେ ଗଡ଼ ।

ଏକା ଏକା ପଥିକକୁ

ଲାଗେ ପଥ ଦୂର

ଏକା ଏକା ଯାତ୍ରା କଲେ

ଥାଏ ମନେ ଡର ।

ଏକା ଏକା ଥିଲେ ଦୁଃଖ

ଲାଗେ ଭାରି ଭାରି

ଏକା ଏକା ଖାଅ ନାହିଁ

ପଞ୍ଚ ମୁଖେ ହରି ।

ଏକା ଏକା ନଦୀ ଯାଇ

ପହଁରିବା ନାହିଁ

ଏକା ଏକା ଲଢ଼ ନାହିଁ

ଏକା ବୋକା ଭାଇ ।

ଏକା ଏକା ଚରୁଥିଲେ

ଛେଳିଙ୍କୁ ବିପଦ

ଏକା ଏକା ସୁଧ ଦେଲେ

ବୁଡ଼େ ମୂଳ ସୁଧ ।

ଏକା ଏକା ଘରେ ଥିଲେ

ଗୃହ ଲାଗେ ଶୂନ୍ୟ

ଏକା ଏକା ଜିଇଁବାରେ

ବୃଥା ଏ ଜୀବନ ।