ମା'ର କୋଳ

ମାଟି ଓ ଆକାଶ ସଦୃଶ ମାଆ

ସ୍ୱଚ୍ଛ ମନ ତା'ର ସେ ସର୍ବଂସହା

ଶିଶୁ ପାଇଁ ଶ୍ରେଷ୍ଠ ମା'ର କୋଳ

ଜଣାପଡ଼େନାହିଁ ସଞ୍ଜ ସକାଳ ।

ମା'ର କୋଳରେ ଶିଶୁଟି ଥିଲେ

ମଶା,ମାଛି,ପୋକ ନବସେ ତିଳେ 

ଖରା,ବର୍ଷା,ଶୀତ ଆସେରେ ଯାଏ

ମାଆର ପଣତ ହଟାଇ ଦିଏ ।

ଝାଡ଼ା ବାନ୍ତି କଲେ ମାଆ କୋଳରେ

ପୋଛି ଦିଏ ମାଆ ସ୍ୱଚ୍ଛ ମନରେ 

ମାଆ ଗପ ଗୀତ ଶିଶୁକୁ ଭଲ

ବୁଝୁ ବା ନବୁଝୁ ମାନଇ ବୋଲ ।

ମାଆ ତା'ବକ୍ଷରୁ ଦିଅଇ କ୍ଷୀର

ଶିଶୁ ପାଇଁ ଏହା ଅମୃତ ଝର 

କୋଳରେ ବସାଇ ଦେଖାଏ ଶଶୀ

ପିଲାର ଖୁସିରେ ମାଆର ଖୁସି ।

 

ମା' କୋଳେ ମିଳଇ ସରଗ ଶାନ୍ତି

ହରଇ ଶିଶୁର ସକଳ କ୍ଲାନ୍ତି

ଶୁଅଇ ଶିଶୁଟି ହୁଅଇ ସଜ

ଶିଶୁ ପାଇଁ କୋଳ ସୁନ୍ଦର ଶେଯ ।

ଯାହାର କୋଳରେ ପିଲାଟେ ନାହିଁ

କୋଟି ଦେବାଦେବୀ ନିତି ପୂଜଇ

ପୂରାଅ ଠାକୁରେ ସକଳ କୋଳ

ଖୁସି ଭରିଦିଅ ବଞ୍ଚାଅ କୁଳ ।

    

ଖେଳି ଖେଳି ଶିଶୁ ହୋଇଲେ କ୍ଳାନ୍ତି

ମା' କୋଳ ଦିଅଇ ସରଗ ଶାନ୍ତି

ସରାଗରେ ମାଆ ଦିଏ ଆଉଁସୀ

ମାଆ ପରି କିଏ ସଂସାରେ ଅଛି ।

ଦଶ ମାସ ମାଆ ଗରଭେ ବୋହି

ଦେଖାଇଛି ମାଆ ସୁନ୍ଦର ମହୀ

ପ୍ରଥମ ଶିକ୍ଷକ ମାଆଟି ଜାଣ

ଶିଶୁ କରେ ତାକୁ ଅନୁକରଣ ।

ସବୁରି ପିଲାଙ୍କୁ ସମାନ ଦେଖେ

ପିଲା ଦୁଃଖ ସୁଖେ ଥାଏ ସେ ପାଖେ

ନିତି ଡାକୁଥାଏ ଜଗା ଠାକୁର

ପିଲାଙ୍କୁ ଉତ୍ତମ ମଣିଷ କର ।

 

ମାଆ ପାଦରେଣୁ ଶରଧା ବାଲି

ମାଆର ମମତା ହୁଏନି ଭୁଲି

ପାଖେ ପାଖେ ଥିଲେ ମାଆ ଆଶିଷ

ବଢ଼ଇ ଆୟୁଷ ବଢ଼ଇ ଯଶ ।