କୁନି ଝିଅ ମିଷ୍ଟି
କୁନି ଝିଅ ମିଷ୍ଟି
ଆମର ଅଛି କୁନି ଝିଅଟି
ନାଁ ଟି ତା'ର ମିଷ୍ଟି
ତାହାର ହସ ତାହାର କାନ୍ଦ
ଲାଗଇ ଭାରି ଟେଷ୍ଟି ।
ଗପ ଓ ଗୀତ ଶୁଣିବା ପାଇଁ
କୋଳରେ ପଡ଼େ ଲୋଟି
ଦୂରେଇ ଗଲେ ଗୋଡ଼କୁ ଛାଟି
କରଇ ବଡ଼ ପାଟି ।
ଅଇନି କଲେ ତୁନି ସେ ଯାଏ
ଧରିଲେ ଖେଳେଣାଟି
ଟିକେ ସରଳ ଟିକେ ଅବୁଝା
ସେ ପୁଣି ଟିକେ ନଟି ।
ତାହାରି ପାଇଁ ଘର ଗହଳ
ତା'ସାଥେ କଲେ ଖଟି
ସମୟ ଜମା ଜଣା ପଡ଼େନି
କୁଆଡ଼େ ଯାଏ କଟି ।
ଆକଟ କରୁ ବୁଝାଇ ଦେଉ
କରିଲେ ଛୋଟ ତ୍ରୁଟି
ବଜାର ଯାଏ ମୋ ସାଥେ ବୁଲେ
ଥିଲେ ମୋହର ଛୁଟି ।
ଖାଇ ବସିଲେ ପାଖରେ ବସେ
ସିଏ ମୋ ଗେଲୁ ବେଟି
ତା' ବିନା ଲାଗେ ସୁନା ପିତ୍ତଳ
ଜୀବନ ଲାଗେ ମାଟି ।
ମିଷ୍ଟି ଆମର ଖୁସିରେ ରହୁ
ଯାଉରେ ଦୁଃଖ ହଟି
ଜଗା ଠାକୁରେ ତୁମ ପୟରେ
ପ୍ରଣାମ କରେ କୋଟି ।