ନିର୍ବାଚନ ନାଟ

ନିର୍ବାଚନ ହୋଇସାରିଛି ଆଡ଼ମ୍ବର ଭରା ନାଟ,

ତୋଷାମଦିଆ ମିଥ୍ୟା ବଚନରୁ ମିଳୁଛି ଚୋଟ,

ନାଟୁଆ ନେତାଙ୍କର ହୋଉଛି ଯେ ଭେଟଭାଟ,

ଜନମତ ହେତୁ ହେଉଛନ୍ତି ଦିନରାତି ଛଟପଟ |୧|

ଅବ୍ୟବହାରିକ ପ୍ରକଳ୍ପର ଦେଖାନ୍ତି କାଳ୍ପନିକ ଚିତ୍ରପଟ,

ଅମୀମାଂସିତ ରୁହେ ଜଟିଳ ଜଞ୍ଜାଳର ଜଟାଜୂଟ ଝୋଟ,

ଦାମ୍ଭିକ ବାଚାଳ ରାଜନେତାଙ୍କୁ ମତଦାତା କରନ୍ତୁ ଚିହ୍ନଟ,

ଛଳ-କପଟ କରି ବାରବୁଲା ନେତା ସୃଷ୍ଟି କରନ୍ତି ସଙ୍କଟ |୨|

ରାଜନୈତିକ ଦଳ ଝଟପଟ କରନ୍ତି ଜନମତ ହେତୁ ଝପଟ,

ପ୍ରଲୋଭନ ଲାଗି ବିଭିନ୍ନ ଭେଟିର ବସେ କ୍ଷଣସ୍ଥାୟୀ ହାଟ,

ଯାହା ପଛପଟରେ ଥାଏ ନିଜ ଉଚ୍ଚାକାଂକ୍ଷା ପୂରଣର ବାଟ,

ଧପ୍ପାବାଜ ନିକଟରେ କାର୍ଯ୍ୟକ୍ରମ ତାଲିକା ସଦା ଥାଏ ବିକଟ |୩|