ଲେଖା ଓ ଲେଖନୀ

ଲେଖୁ ଲେଖୁ ଦିନେ 

   ଲେଖିଦେଲି ଯେବେ

     ହୃଦୟର କିଛି ବ୍ୟଥା 

ଗୋପନରେ ଆସି

   ଚଗଲା ଭଅଁର

     ପଢିନେଲା ସବୁ କଥା ।

          

କହିନି ଜହ୍ନକୁ

  ମନ କଥା ଖୋଲି

     କହିଦେବ କାଳେ ସିଏ

ଅୟୁତ ତାରକା

  ସାଥେ ଅଭିସାରେ

     ରାତି ତାର ବିତିଯାଏ ।

ଫୁଲ ସ୍ମିତ ହାସେ

   ଇସାରାରେ ମୋତେ

     କରୁଥିଲା କେତେ ପ୍ରଶ୍ନ

ପ୍ରଜାପତି ସାଥେ

  ପଢିନେଉଥିଲା

    ମୋ ଆଖିର ପ୍ରୀତି ଚିହ୍ନ ।

ସାଗର କୂଳରେ

  ବେଳାଭୂମି ପରେ

     ଆଙ୍କିନି ମୁଁ ତାଙ୍କ ଛବି

ଶାମୁକା କାନରେ

  କହିନି ସେ କଥା

    ପ୍ରିୟସଖୀ ମନେ ଭାବି ।

ଆଖି ପଲକରେ

  ସଜାଇ ଦେଇନି

    ଭ୍ରମର କଳାର ରଙ୍ଗ

ରାତି ଭାରି ଦୁଷ୍ଟ

  ନିଦ ବାହାନାରେ

    ରଚିବ ନାନା ସୁଆଙ୍ଗ ।

ପ୍ରୀତିର ମାଧୁର୍ଯ୍ୟ

   ଶବ୍ଦର ପ୍ରାଚୁର୍ଯ୍ୟ

     ଭାବନାର ମଧୁଗୀତୀ

ଉଦାସ ଉଲ୍ଲାସ

   ରାଗ ଅନୁରାଗ

     ହୃଦୟର ମଧୁପ୍ରୀତି ।