ଅଭିପ୍ସା *******

ଅଭିଳାଷ 
××××××××××
ଆଖି ପଲକରେ 
    ରଖିଥିବ ମତେ 
       ହୃଦୟେ ନ ହେଲେ ନାହିଁ 
ଝୁରିବନି ମତେ 
    ଝୁରିହେଲେ ପରା 
        ଲୁହ ହୋଇ ଯିବି ବହି l
ସାଥୀ ନୁହେଁ ସିନା 
    ସାଥେ ସାଥେ ଥିବି 
        ଅଦୃଶ୍ୟ ଛାଇଟେ ହୋଇ 
ଭୁଲିଯିବ ଯଦି 
    ଛାଇକୁ ଦେଖିଲେ 
        ଜୀବନ୍ୟାସ ଯିବି ପାଇ l
ସପନରେ କେବେ 
     ରଖିବନି ମତେ 
         ରାତି ଶେଷେ ଯିବି ଚାଲି 
ନିଦ ଭାଙ୍ଗିଗଲେ 
   ସ୍ୱପ୍ନ ତୁଟି ଯିବ 
       ବ୍ୟଥା ରହିଯିବ ଖାଲି l
ଭାବରେ ନ ହେଲେ 
     ଶବ୍ଦରେ ଅଳପ 
         ଦେଉଥିବ ମତେ ଯୋଡି 
ନାୟିକା ନ ହୁଏ 
     ଭାବର ମାଧୁର୍ଯ୍ୟ 
         ମୋ ସ୍ପର୍ଶରେ ଯିବ ବଢ଼ି l
ହୃଦୟ ସ୍ପନ୍ଦନେ 
    ନ ରଖିଲେ ନାହିଁ 
         ପବନରେ ଭାସୁଥିବି 
ପ୍ରଶ୍ୱାସ ବାୟୁରେ 
    ଅମ୍ଳଜାନ ହୋଇ 
        ନୀତି ଆତ୍ମା ଛୁଇଯିବି l
କ୍ଷୀର ସାଥେ ନୀର 
      ମିଶିଲା ପରିକି 
          ତୋ ଆତ୍ମାରେ ମିଶିଯିବି 
ମାପିବାକୁ ଚାହିଁ 
     ମାପି ପାରିବୁନି 
          ଏମିତି ମୁଁ ହଜିଯିବି l

ସୁଜାତା ଦାସ 
ବାଲେଶ୍ୱର