ଲାଇବ୍ରେରୀ
ପ୍ରୋଫାଇଲ୍
କିଛି କଥା କିଛି ବ୍ୟଥା 🌹🌹🌹🌹🌹🌹
କିଛି କଥା କିଛି ବ୍ୟଥା 🌹🌹🌹🌹🌹🌹
କିଛି କଥା କିଛି ବ୍ୟଥା
***************
ତୁମେ କହୁଥିଲ
ଅନିନ୍ଦ୍ୟ ସୁନ୍ଦରୀ
ପ୍ରୀତିପଦ୍ମା ଶଶୀକଳା
କେବେ କହୁଥିଲ
ନୀଳ କଇଁ ମୋର
କନକ କଟି ମେଖଳା l
ଏତେ ସବୁ ମିଠା
ଶବ୍ଦର ଛନ୍ଦକୁ
ଭାବିନେଲି ନିଜ ପାଇଁ
କେମିତି ଜାଣିବି
ପ୍ରୀତିର ରାଗିଣୀ
ଶୁଣୁଥିଲା ଆଉ କେହି l
ଅଜାଡୁ ଥିଲି ମୁଁ
ପ୍ରଣୟର ମଞ୍ଜି
ମୋ ଆଞ୍ଜୁଳି ଭରି ଭରି
ଦେଉଥିଲି ବୁଣି
ହୃଦୟ କ୍ଷେତରେ
ସିଞ୍ଚି ମମତାର ବାରି l
ଭାବୁଥିଲି ପ୍ରେମ
ଏକାନ୍ତ ନିଜର
ନାହିଁ କେହି ଅଧିକାରୀ
ରାତି ନିଦ ସ୍ବପ୍ନ
ପ୍ରଶ୍ୱାସ ସ୍ପନ୍ଦନ
ମୋ ପାଇଁ ହୁଅନ୍ତି ଝୁରି l
ସ୍ବପ୍ନ ଭଲ ଲାଗେ
ଆଖିର ପଲକେ
ରାତିର ପଣତ ତଳେ
ରାତି ସରିଗଲେ
ସ୍ବପ୍ନ ଭାଜିଗଲେ
ହୃଦୟ ଏକାନ୍ତେ ଜଳେ l
ବିଞ୍ଚି ଦେଉଥିଲି
ଶବ୍ଦର ପରାଗ
ଛୁଇଁବି ବୋଲି ହୃଦୟ
ପ୍ରୀତିର ଛନ୍ଦରେ
ଭାବ ସୁଗନ୍ଧରେ
ଲାଗୁଥିଲା ମଧୁମୟ l
ଆଞ୍ଜୁଳିରେ ମୋର
ଥିଲା ଭରପୁର
ଖୁସି ଫୁଲ ପାଖୁଡ଼ାରେ
ଆଜି ଶିରୀହୀନ
ମନ କୁଞ୍ଜବନ
ଶୁଷ୍କ ସବୁ ଛଳନାରେ l
****************
ସୁଜାତା ଦାସ
ବାଲେଶ୍ୱର
