ଶେଷାଭିସାର

ଆଗୋ ପ୍ରିୟତମ ନ କରି ସରମ 

କହିଦିଅ ଖୋଲି ମରମ କଥା 

ଜାଗେ ଏ ଭରମ ଆଉ କେତେକ୍ଷଣ

ଅକାରଣେ କିଆଁ ଏ ନୀରବତା ।

ନଇଁଲାଣି ସଞ୍ଜ କାଲିର ସୂରୁଜ 

ଦେଖିବାକୁ ଜୀବ ଥିବ କି' ନାହିଁ 

ତୁଚ୍ଛା ଅଭିମାନ କର ଗୋ ମୋଚନ

ଅମୂଲ୍ୟ ସମୟ ଯାଉଛି ବହି ।

ଅଧୀର ଅଧର ମଦିରା ମଧୁର 

ପିଇବାରେ ଆଜି ଦେବିନି ବାଧା 

ବ୍ରୀଡାନତ ଏଇ ପଲକ ପୁଲକେ 

ଲେଖିବ କାହାଣୀ ଅଛି ଯା' ଅଧା ।

ଦେଖ ଚନ୍ଦ୍ରମା ତନ୍ଦ୍ରାବିଭୋରେ 

ଲୁଚିଅଛି କାହିଁ ବାଦଲ କୋଳେ 

ଘନ ଏ ରଜନୀ ଗାଏ ଆବାହନୀ 

ବାନ୍ଧି ନେବି ଗୋ ବାହୁମୃଣାଳେ ।

ପ୍ରୀତି ପୀୟୁଷର ମନ୍ଦାକିନୀ ଧାର 

ଅବାରିତେ ଆଜି ଯାଉ ଗୋ ଝରି

ମିଳନ ବଂଶୀର ମଧୁମୂର୍ଚ୍ଛନାରେ 

ଝଙ୍କୃତ ହେଉ ଏଇ ଶର୍ବରୀ ।

ନିରବ ସଂଗୀତ ଗାଏ ଅବିରତ

ମେଘମେଦୁରିତ ତାମସୀ ରାତ୍ରି 

ରଚିଯିବା ଏକ ନୂଆ ଇତିହାସ 

ଶିହରିତ ପ୍ରାଣ ନ ହେଉ ଇତି ।

ମରଣ ଦୁଆରେ ଅରପିବା ଆଗୁ 

ଶ୍ରାନ୍ତ କ୍ଳାନ୍ତ ଏ ଚରଣ ଦୁଇ 

ଆସ ପ୍ରିୟ ସାଥୀ ଗାଇ ମଧୁଗୀତି 

ଆଉ କିଛି କ୍ଷଣ ଯିବା ଗୋ ଜୀଇଁ ।