ଉଜ୍ଜ୍ୱଳ ଭବିଷ୍ୟତ.

ପିଲା ଭବିଷ୍ୟତ ଉଜ୍ଜ୍ୱଳ ପାଇଁ ଯେ

    ପିତା ମାତାଙ୍କ କର୍ତ୍ତଵ୍ୟ

ଭଲ ଉପଦେଶ, ସଂସ୍କାର ସଂସ୍କୃତି

   ପିଲାଙ୍କୁ ଗଢ଼ି ତୋଳିବ ।

ଛୋଟ ପିଲା ଅଟେ ମାଟିର ପିଣ୍ଡୁଳା 

   ଗଢିବା ଆମେ ଯେପରି

ସେହିପରି ସିଏ ନିଶ୍ଚୟ ହୋଇବେ

    ପାରିଲେ କର୍ତ୍ତବ୍ୟ କରି ।

ଆଚରଣ ଆଉ ଉଚ୍ଚାରଣ ଦୁଇ

   ପିଲା ଆମଠୁ ଶିଖିବେ

ପରିବାର ତାଙ୍କ ବଡ଼ ଶିକ୍ଷା କେନ୍ଦ୍ର

    ସେଠାରେ ତାଲିମ ନେବେ ।

କଥାରେ କହିଲେ ଚଳିଯିବ ନାହିଁ

   ନିଜେ କରିବ ସେପରି

କହୁଥିବ ଯାହା କରୁଥିବ ତାହା

   ଦେଖିବେ ପିଲା ଯେପରି ।

ନିଜେ ପରପାଇଁ ମନ୍ଦ ଚିନ୍ତାକରି

   ପିଲାଙ୍କୁ ଯେ ଉପଦେଶ

ଦେବ ଯଦି ତୁମେ ତାହାହେଲେ ପିଲା

   ଭବିଷ୍ୟତ ହେବ ନାଶ ।

ଭଲ କର୍ମ କଲେ ଭଲ ଫଳ ମିଳେ

   ଏହାକୁ ରଖି ମନରେ

ପିଲାଙ୍କ ଉଜ୍ଜ୍ୱଳ ଭବିଷ୍ୟତ ତେବେ

   ଦେଖିବ ଦୁଇ ଆଖିରେ ।

ପିତା ମାତା ହେଲେ ସନ୍ତାନ ଗଢିବା

    ଗୋଟିଏ କୁଟୀର ଶିଳ୍ପ

ଉଜ୍ଜ୍ୱଳ ଭବିଷ୍ୟତ ଗଠନ ପାଇଁ

    ତାଙ୍କର ତ୍ୟାଗ ଅମାପ ।

ଭଲ ଶିକ୍ଷା ଭଲ ମଣିଷ କରିବ

   କୁବୁଦ୍ଧି କରିବ ଚୋର

ପିଲା ମାନେ ଅନୁକରଣର ପ୍ରିୟ

   ତେଣୁ କର ସୁଵିଚାର ।