ସର୍ବଦା ସ୍ୱତନ୍ତ୍ର

ବିଭବ ମଣ୍ଡିତ ସର୍ବଦା ସ୍ୱତନ୍ତ୍ର ଉତ୍କଳ ପ୍ରଦେଶ ମୋର

ଗଙ୍ଗାନଦୀଠାରୁ ଗୋଦାବରୀଯାଏଁ ସୀମା ପରିବ୍ୟାପ୍ତ ଯା'ର

ନଦୀ,ଗିରି,ବନ,ପାହାଡ଼,ପ୍ରାନ୍ତର ଲାଗେ ଭାରି ଆପଣାର

ଜନ୍ମ ନେଇଛନ୍ତି ଯାହାର ବକ୍ଷରେ ଶତ ଶତ ଶୂରବୀର ।

ସବୁଠୁ ନିଆରା ସବୁଠୁ ମଧୁର ପ୍ରଥା ପରମ୍ପରା ତା'ର

ନୃତ୍ୟ,ଗୀତ,କଳା ସଂସ୍କୃତି ସମ୍ପନ୍ନ ସାରା ଜଗତରେ ସାର

ମୋ'ଓଡ଼ିଆ ଭାଷା ପ୍ରୀତି ପରିପୂର୍ଣ୍ଣା ଆହା କେଡେ ସୁମଧୁର

ଗୁଣ ଗଉରବ ଗାଉଛି ନିଇତି ସାହିତ୍ୟର ଅଳଙ୍କାର ।

କୋଣେ ଅନୁକୋଣେ କାରୁକାର୍ଯ୍ୟପୂର୍ଣ୍ଣ କୀର୍ତ୍ତିରାଜି ଭରପୂର

କୋଣାର୍କର କଳା ବିଶ୍ୱ ଦରବାରେ ଅଦ୍ୱିତୀୟ ନିରନ୍ତର

ଶ୍ରୀକ୍ଷେତ୍ର ଧାମରେ ଅତି ଗଉରବେ ନେତ ଉଡେ ଫରଫର

ଉତ୍କଳ ଗାରିମା ମହାନତା ଗାଥା କରୁଅଛି ସୁପ୍ରଚାର ।

ପବିତ୍ର ଭୂମିର ମିଠା ପରଶରେ ଗଢା ଏ ଶରୀର ମୋର

ସ୍ମରି ସ୍ୱାଭିମାନ ଉତ୍କଳ ମା ପଦେ କରୁଅଛି ନମସ୍କାର ।