ପୁଲୱାମା ଶହୀଦଙ୍କୁ ଶହେ ସଲାମ

ଅଶାନ୍ତ ଭୂସ୍ୱର୍ଗ ଜମ୍ମୁ ଓ କାଶ୍ମୀର

ଚଳାଇଛି ଶତ୍ରୁ ଛଦମ ଯୁଦ୍ଧ 

ଖଟାଇ ତା ବଳ ଦୁର୍ବୁଦ୍ଧି କୌଶଳ 

ଘଟାଉଛି ହୀନ ବର୍ବର କାଣ୍ଡ ।

ରହୁଛନ୍ତି ଲୁଚି ଜନତା ଗହଣେ

ବଇରୀ ପିଶାଚ ସନ୍ତ୍ରାସବାଦୀ

ସୁଯୋଗକୁ ଉଣ୍ଡି ଅସ୍ତ୍ର ବିସ୍ଫୋଟକେ

ନିରୀହ ଜୀବନ ଚାଲନ୍ତି ବଧି ।

ରହିଛନ୍ତି ଜଗି ସୀମାକୁ ଆମର

ଦେଶପ୍ରେମୀ ବୀର ଭାରତ ସୈନ୍ଯ 

ଲଗାଇଣ ଘାତ ଜୀବନକୁ ତାଙ୍କ 

କରନ୍ତି ବର୍ବର ସେ ଆକ୍ରମଣ ।

ଗହଳୀ ମଧ୍ଯରୁ ଫୋପାଡନ୍ତି ଟେକା

ବରଷନ୍ତି ଶିଳା ଗୋଳା ବାରୁଦ

ସ୍ଥିତି ପ୍ରତିକୂଳ ଭାରତ ସେନାନୀ

ଦିଅନ୍ତି ସୁରକ୍ଷା ବରି ବିପଦ ।

ବିଗତ ଦଶକେ ହେଲା ସଂଘଟିତ

ସନ୍ତ୍ରାସ ଘଟଣା ବହୁ ଅଧିକ

ପଠାଣକୋଟର ଭେଦି କବଚକୁ

ଗୁଳି ଚୋଟେ ମଲେ ବହୁ ସୈନିକ ।

ଘଟିଲା ସେମିତି ପାମ୍ପୋର ଉରିରେ

ଶହୀଦ ହୋଇଲେ ବୀର ଜବାନ

କମାଣ୍ଡୋ ତାଲିମ କେନ୍ଦ୍ର ଥରିଗଲା

ଲିଥାପୋରେ ହେଲା ଗୁଳି ବର୍ଷଣ ।

ଜମ୍ମୁ ଶ୍ରୀନଗର ରାଜପଥ ମାର୍ଗେ

ଯାଉଥିଲେ ସେନା ବାହନ ଧରି

ହଠାତ ପ୍ରବେଶି ଏକ ଆତ୍ମଘାତୀ

କରିଲା ବିସ୍ଫୋଟ ବୋମା ଆବୋରି ।

ଚାଳିଶ ଜବାନ ହୋଇଲେ ଶହୀଦ 

ଦୁର୍ଘଟଣା ଥିଲା ବର୍ବରୋଚିତ

ଜବାନଙ୍କ ଉଷ୍ମ ରକତପାତରେ 

ସ୍ତମ୍ଭିତ ଭାରତ ଶୋକ ସନ୍ତପ୍ତ ।

ପ୍ରତି ଭାରତୀୟ ଜାଗ୍ରତ ଆଜି

ରଖିବ ଅତୁଟ ତା ସ୍ବାଭିମାନ 

ପ୍ଲାଜମା ବୀର ଶହୀଦ ଜବାନ

ଜଣାଉ ତୁମକୁ ଶତ ସଲାମ ।