Library
Profile
ନିର୍ମୋହ ନୈବେଦ୍ୟ
ନିର୍ମୋହ ନୈବେଦ୍ୟ
1 min
546
ନିର୍ଜନ ରଜନୀ ଆଉ
ନିରୋଳା ପରିବେଶ
ନିଦ୍ରିତ ପୃଥିବୀ ପୁଣି
ନିଶ୍ଚୁପ ଆକାଶ |୧|
ନିଃସ୍ଵ ମୋର ଏ ଜୀବନେ
ନାହିଁ ଲୋଡା କିଛି
ନିଜ ମଧ୍ୟେ ଜାଳିବାକୁ
ନିଃସଙ୍ଗତା ଆଜି |୨|
ନିଃସର୍ତ୍ତ ପ୍ରେମରେ ବନ୍ଧା
ନିରୀହତା ମୋର
ନିରବଧି ବିତିଯାଉ
ନିକଟରେ ତା'ର |୩|
ନିତି ତାକୁ ଦେଖୁଥିବି
ନିଃସଙ୍କୋଚେ ବସି
ନିନ୍ଦିବି କି ଆଉ ଅବା
ନିରାଶାରେ ହସି |୪|
Advertisement
>ନିର୍ବାଣ ଯେ ଲୋଡା ନାହିଁ
ନିମଗ୍ନତା ଚାହେଁ
ନିର୍ବିବାଦେ କାଟି ଦେବି
ନିଜ ମଧ୍ୟେ ଭୟେ |୫|
ନିୟତିର ଆହ୍ଵାନରେ
ନିୟମରେ ବନ୍ଧା
ନର୍ତ୍ତକୀ ମୁଁ ସାଜିଅଛି
ନୂପୁରରେ ଛନ୍ଦା |୬|
ନାନ୍ଦନିକ ଦୃଶ୍ୟ ପ୍ରାୟ
ନୃତ୍ୟରତା ସ୍ଥିତି
ନଶ୍ଵର ନ ହେଉ ଆଜି
ନିରପେକ୍ଷ ପ୍ରୀତି |୭|
ନିଜ ହୃଦେ କରେ ତା'ର
ନିଭୃତ ଅର୍ଚ୍ଚନା
ନିରାକାର ଚରଣେ ମୋ
ନୀରବ ପ୍ରାର୍ଥନା |୮|
