ଧର୍ମର ହେଉ ଜୟ ମା'
ଧର୍ମର ହେଉ ଜୟ ମା'
ଦକ୍ଷ ରାଜ ଯଜ୍ଞ ହୋମାନଳେ ଲୀନ,
ପୁଣି ସେହି ହୋମାନଳୁ ତୋର ଜନ୍ମ;
ଅଯୋନି ସମ୍ଭୁତା ଗିରିଜା;
ଦଶ ଭୁଜେ ଦଶ ଆୟୁଧ ଝଲସେ,
ପଦେ ପ୍ରଲମ୍ଵିତ ମହିଷାସୁର ସେ;
ନିପତିତ ଛିନ୍ନ ଧ୍ଵଜା ।।
ତିନିପୁର ଜିଣି ସେ ରାକ୍ଷସ ମଣି,
ଅନେକ ଯାତନା ଭୋଗିଲା ଧରଣୀ;
ଦେବେ କଲେ ତାର ପୁଜା;
ପାଦ ତଳେ ତୋର ଦୀନ ହୀନ ହୋଇ,
ପଡ଼ିଛି କେମିତି ଜଗତ ଦେଖଇ;
ଶ୍ରୀହୀନ ରାକ୍ଷସ ରାଜା ।।
ଧର୍ମର ବିଜୟ ଅଧର୍ମର କ୍ଷୟ,
ପୂଣ୍ୟର ଅକ୍ଷୟ ଧରମର ଜୟ;
ଶାରଦୀୟ ସାଜ ସଜା;
ଆସ ଭଗବତୀ ବିଶ୍ଵ ପ୍ରିୟା ପ୍ରୀତି,
ଗଢିଉଠୁ ଦେବୀ ପାଇ ତୋ ଶକତି;
ବାଜା ମହୁରୀଆ ବଜା ।।
ରାକ୍ଷସର ମାୟା ରାକ୍ଷସ ଶକତି,
ଲୀନ ହେଲା କ୍ଷଣେ ଅଶୁଭ ବିପତ୍ତି;
ଉଡିଲା ତୋ ରଙ୍ଗ ଧ୍ଵଜା;
କ୍ଷମାମୟୀ ମହାଶକ୍ତି ସ୍ଵରୂପିଣୀ,
ଦଶ ମହାବିଦ୍ୟା ତୁ ଏକା ଜନନୀ;
ପାଦପଦ୍ମେ କରେ ପୁଜା ।।
ଯେତେ ତୋ ବର୍ଣ୍ଣନା କରିଲେ “ମାନେନା,-
ମନ” ମହାଦେବୀ କୈଳାସ ମଣ୍ଡନା;
ଆକୁଳେ ଡାକେ ବିରଜା;
ପ୍ରଫୁଲ୍ଲ ଫୁଲରେ ଗଢି ସିଂହାସନ
ହୃଦୟ ବେଦୀରେ ହୁଅ ମା ଆସିନ
ବାଜିଉଠେ ବୀର ବାଜା ।।