ଗାଆଁରେ ପଡ଼ିବ ହୁରି

ଆଈମାଆ ମୋତେ ଡାକ ଛାଡ଼ିଲାଣି

ଚୁମୁକି ଚୁମୁକି ବୋଲି ,

ସେତିକିରେ ଥାଉ ଗପସପ ଆଜି

ଘରକୁ ମୁଁ ବାହାରିଲି ।

ସଞ୍ଜ ଆସି ପରା ଘଡ଼ିଏ ହେଲାଣି

ଆସିଛି ବାହାନା କରି ,

ଜାଣିଦେବେ ଯଦି ତମ ଆମ କଥା

ଗାଆଁରେ ପଡ଼ିବ ହୁରି ।

ମନ ହେଉଥିଲା ହାଇଁପାଇଁ ଖାଲି

ତୁମକୁ ଭେଟିବା ଲାଗି ,

କେତେ କଥା ପରା ଭାବି ରଖିଥିଲି

ତୁଚ୍ଛାରେ ଯା' ଗଲ ରାଗି ।

ତୁମେ ସିନା ମୋତେ ବୁଝାଇ କୁହନ୍ତ

ଓଲଟା କହୁଛି ମୁହିଁ ,

କେଡ଼େ ଶରଧାରେ 'ଚକୁଳି' ତିଆରି

ଆଣିଥିଲି ତୁମପାଇଁ ।

କେତେବେଳୁ ଆସି ଅପେକ୍ଷା କରିଛ

ତେଣୁ ଗରଗର ହୁଅ ,

ସବୁବେଳେ ଲୋକ ହାଉଯାଉ ଏଠି

ମୁଁ କିସ କରିବି କୁହ !!

ମନ ଦେଇଅଛି ତୁମକୁ ବୋଲି ତ

ସରାଗରେ ଧାଇଁ ଆସେ ,

କଥାରେ ଅଛି ପା' ଯା' ମନ ଯେଉଁଠି

କିଆ ଫୁଲ ପରି ବାସେ ।

ସେତିକିରେ ଥାଉ ରାଗ ରୁଷା ଆଜି

ଆଈ ଛାଡ଼ିଲାଣି ରଡ଼ି ,

ଗଲେ ତାକୁ ଏବେ କି ଉତ୍ତର ଦେବି

ଆସିଲାଣି ଚିନ୍ତା ମାଡ଼ି ।