ମନ କିଆଁ ଆନମନା

ଶୀତ ରାତି ମିଠା ମୁଠାଏ ସପନ

ଉଆଁସୀ ଜହ୍ନର ହସ

କୁମୁଦିନୀ ଝଳେ ଜଳେ ଢଳି ଢଳି

ବିତରି ମଧୁ ସୁବାସ ।

ଅନୁରକ୍ତ ଜହ୍ନ ପ୍ରିତୀ ମହକରେ

ଉଲ୍ଲସିତ ହୁଏ ମନ

ଅପାସୋରା ତୁମ ଅଭୁଲା ଚାନ୍ଦିନୀ

ରାକା ରାତି ରମ୍ୟ ପ୍ରେମ ।

ମହକ ମାଧୁରୀ ଅପରୂପା ସହୀ

ପ୍ରିତୀ ର ରଜନୀଗନ୍ଧା

ଯାମିନୀ ସଜନୀ ତୋ ପ୍ରଣୟ ଫାନ୍ଦେ

ପଡିଅଛି ହୋଇ ବନ୍ଧା ।

ଦୁରୁହ ସଂଗୀତ ସତେ ଆରେ ମିତ

ଗାଇବା ସହଜ ନୁହେଁ

ତୋ ପ୍ରେମ ଜାଲରେ ଛଟପଟ ହୁଏ

ଆୟୁ ସରିସରି ଯାଏ ।

କି ମୋହିନୀ ମନ୍ତ୍ର ଜାଣିଛ ସଜନୀ

ହୃଦୟ ବେଦୀ ରେ ବସି

ଯେତେ ମୁଁ ଭୁଲୁଛି ତହୁଁ ବଳି ମନେ

କ୍ଷଣେ କ୍ଷଣେ ଉଠ ଭାସି ।

କୁଆଁରୀ କାମାକ୍ଷା ରାଇଜର “ରତୀ- 

ରାଣୀ” ଆଗୋ ରଙ୍ଗବତୀ

ପଲକେ ପଲକେ ତୁମ ଚିତ୍ରପଟ

ଭାବନାରେ ହରେ ମତି ।

ରଜତ ଜୋଛନା ଛଇଳୀ ମାୟାର

ମାୟାବିନୀ ପ୍ରେମେ ରାତି

ଅଭୁଲା ମନର ଭାବକୁ ବଖାଣି

ଆନମନା କରେ ପ୍ରୀତି ।