ଆସ ମହାକାଳୀ

   

ଏଥର ହସିବ ମୋ'ଦେଶର ଗାଆଁ

ସହର ବଜାର ଗଳି,

ବିବିଧ ରଙ୍ଗର ଆଲୋକର ମାଳା 

ସଂଜରେ ଉଠିବ ଜଳି ।

ଗହଳ ଅନ୍ଧାରେ ଦୀପ ଟିଏ ଜାଳି

କରୁଅଛୁ ଆବାହନ,

ଆସ ମହାକାଳୀ ଜାଳୁଛୁ ଦୀପାଳି 

ଦିଅ ମାଗୋ ଦିବ୍ୟ ଜ୍ଞାନ।

ରଙ୍ଗ ବେରଙ୍ଗର ତୋରଣ ସହିତ

ମଣ୍ଡପ ହେଲାଣି ସଜା,

ଭେରୀ,ତୁରୀ,ଶଙ୍ଖ,ଢୋଲ,କରତାଳେ 

ବାଜିବ ତେଲିଙ୍ଗି ବାଜା ।

ଆସୁଛନ୍ତି ମାଆ ଜଗତ ଜନନୀ

ମରତ ହେଲାଣି ସଜା

ଗଗନ ପବନ ମୁଖରିତ କରି

ବଜାରେ ବାଇଦ ବଜା ।

ପବନ ଦୋଳିରେ କାଶଫୁଲ ଝୁଲେ

ଘାସ ପତରରେ ମୋତି,

କିଏ ବୁଣିଦେଲା ସକାଳ କିରଣେ 

ଝଟକି ଉଠୁଛି ଜ୍ୟୋତି ।

ହେନା, ଯୂଈ,ଜାଇ ସଜ ହୋଇଲେଣି

ଶେଫାଳୀ ଗଲାଣି ଝରି,

ପ୍ରଭାତରୁ ଉଠି ଡାକି ଲାଣି କାକ

ଉଠ ଉଠ ନର ନାରୀ ।

ଘରେ ଘରେ ଆଜି ଜାଳି ଦେବା ଦୀପ

ଅନ୍ଧାରକୁ କରି ନାଶ,

ବଡବଡୁଆହୋ ଆଲୁଅରେ ଯାଅ    

ଅନ୍ଧାରରେ ତୁମେ ଆସ ।

ଦୁର୍ଗତିନାଶିନୀ,ଖର୍ପର ଧାରିଣୀ

ଆଶିଷ କଳସ ଧରି,

ମରତ ମାଟିର ପ୍ରାଣୀ ଜଗତର

ଦୁଃଖ ନେବେ ସବୁ ହରି ।