ମୁଁ ଜଣେ ଗର୍ବିତ ଓଡ଼ିଆ
ମୁଁ ଜଣେ ଗର୍ବିତ ଓଡ଼ିଆ
ଉଡ୍ରଜାତିର ଦାୟାଦ ଓଡ଼ିଆ କଳିଙ୍ଗ ଉତ୍କଳବାସୀ ,
ଗର୍ବରେ କହିବି ମୁଁ ଜଣେ ଓଡ଼ିଆ ଯୁଗ ଯୁଗର ସାହସୀ |
ପୁରାଣ କାହାଣୀ ଇତିହାସ କହେ-ଆମ ଅତୀତର ଗାଥା,
ଇତିହାସ ସାକ୍ଷୀ କଳିଙ୍ଗ ଯୁଦ୍ଧରେ ଦେଇଥିଲୁ ଲକ୍ଷେ ମଥା |
ଗଣତନ୍ତ୍ର ନୀତି ମୂଳରୁ କଳିଙ୍ଗ ରାଇଜରେ ଚାଲିଥିଲା,
ସାହସୀ କଳିଙ୍ଗ ବୀର ଇତିହାସେ ସ୍ଵର୍ଣ୍ଣାକ୍ଷରେ ଲେଖାଗଲା |
ଚଣ୍ଡାଶୋକ ଦିନେ ଏ’ ମାଟିରେ ବସି ହୋଇଥିଲେ ଧର୍ମାଶୋକ,
ଶାସନ କୌଶଳ ଜୀବନର ମୂଲ୍ୟ ଶିଖି ହୋଇଲେ ସେବକ |
କଳାରେ କୁଶଳୀ ଉତ୍କଳ ସନ୍ତାନ ଗଢିଲେ କୋଣାର୍କ କୀର୍ତ୍ତି,
ଜଗନ୍ନାଥ ଧାମ ଜଗତେ ବିଖ୍ୟାତ ବସିଲେ ଚତୁର୍ଦ୍ଧା ମୂର୍ତ୍ତି |
ଖାରବେଳ ବୀର ଓଡ଼ିଆ ଜାତିର ବଢାଇଲେ ସ୍ଵାଭିମାନ,
ଦେଶପ୍ରେମୀ ଭାବେ ଖ୍ୟାତ ସେ ସମ୍ରାଟ ଗଢିଥିଲେ କୀର୍ତ୍ତିମାନ |
ପ୍ରଥମ ଓଡ଼ିଆ ରାଜା କପିଳେନ୍ଦ୍ର ଗଙ୍ଗାଠାରୁ ଗୋଦାବରୀ,
ଶାସନ କରିଲେ ଯଶ ବଢାଇଲେ ଜଗନ୍ନାଥ ନାମଧରି |
କୋଟିଏ ରାଜାଙ୍କ ମଉଡ଼ମଣି ତ ପୁରୀ ରାଜା ଗଜପତି,
ପ୍ରଥମ ସେବକ ଝାଡୁ ସେ ଦିଅନ୍ତି ହୋଇ ଜଣେ ମହାମତି |
ପ୍ରାଚୀନ ସମୃଦ୍ଧ ମାତୃଭାଷା ମୋର ସରଳ ଆଉ ସୁନ୍ଦର,
ଗର୍ବିତ କରିଛି ଭାଷା ଜନନୀ ମୋ ତା’ ପାଦେ କୋଟି ଜୁହାର |
ବେଳାଭୂମି କିବା ଚିଲିକା ହ୍ରଦର ତୁଳନା ଜଗତେ ନାହିଁ,
ଖଣିଜ ସଂପଦ ଭରା ମୋର ରାଜ୍ୟ ମହାନଦୀ ଯାଏବହି |
ଆମ ନଦୀ ନାମ କି ସୁନ୍ଦର ସତେ ଋଷିକୁଲ୍ୟା ବୈତରଣୀ,
ସୁବର୍ଣ୍ଣରେଖା କି ଇନ୍ଦ୍ରାବତୀ ନାମ ଦେଲା କିଏ କେଜାଣି |
ଧାନ ଜନ୍ମସ୍ଥାନ ଆମ କୋରାପୁଟ କୃଷିରେ ଆଗୁଆ ଆମେ,
ଏକାମ୍ର କ୍ଷେତ୍ରରେ ଲକ୍ଷେଶିବ ପୂଜା ଜାତିନାହିଁ ପୁରୀଧାମେ |
ଷାଠିଏ ପ୍ରକାର ଆଦିବାସୀ ପୁଣି ତାଙ୍କର ସଂସ୍କୃତି କଳା,
ସମୃଦ୍ଧ କରିଛି ତାଙ୍କ ନୃତ୍ୟଗୀତ ପ୍ରକୃତିର ପୂଜା ମେଳା |
ମନ୍ଦିର ମାଳିନୀ ସବୁଜ ବନାନୀ ଅଭୟାରଣ୍ୟର ଜୀବ,
ସର୍ବଧର୍ମ କ୍ଷେତ୍ର ଉତ୍କଳ ଭୁବନେ ବର୍ଷସାରା ହୁଏ ପର୍ବ |
ଶାସ୍ତ୍ରୀୟ ମର୍ଯ୍ୟାଦା ସ୍ଵୀକୃତ ମୋ ଭାଷା ପ୍ରାଚୀନ ସମୃଦ୍ଧ ବୋଲି,
ଆମ ଖାଦ୍ୟ-ପେୟ ସ୍ଵତନ୍ତ୍ର ଅପୂର୍ବ ଶ୍ରୀକ୍ଷେତ୍ର ଅବଢା ଡାଲି |
ମହିଳା ସମ୍ମାନ ସୁଉଚ୍ଚ ଆସନ ଦେଇଥାଏ ରଜପର୍ବ,
ଓଡ଼ିଶୀ ନୃତ୍ୟର ରଙ୍ଗ ରସ ଭାବ ଆମପାଇଁ ଦିଏଗର୍ବ |
ସାତ ସମୁଦ୍ରକୁ ପାରିହୋଇ ଆମ ସାଧବ ବୋଇତ ଧରି,
ଦେଶ ବିଦେଶରେ କୀର୍ତ୍ତି ଅର୍ଜିଥିଲେ ବାଣିଜ୍ୟ ବେପାର କରି |
ନାରୀ ଜାଗରଣ ସ୍ଵଚ୍ଛତା ସୁରକ୍ଷା ଜାତିଭେଦର ଉଚ୍ଛେଦ,
ପ୍ରଥମେ ରଚିଲେ ବଳରାମ ଦାସ ଶ୍ରୀହରି ଲକ୍ଷ୍ମୀ ବିବାଦ |
ସାରଳା ଲେଖିଲେ ପ୍ରଥମେ ଅନନ୍ୟ ମହାଭାରତର ଗାଥା,
ଜଗନ୍ନାଥ ଦାସ ଭାଗବତ ଲେଖି ଦୂରେଇଲେ ଜାତିବ୍ୟଥା |
ଉପେନ୍ଦ୍ର ଭଞ୍ଜଙ୍କ କାବ୍ୟ କବିତାରେ ରହିଛି ସତେ ମନ୍ତର,
ରାଜପଦ ଛାଡ଼ି କଲମ ଚଳାଇ ହେଲେ ଶବ୍ଦ ଜାଦୁକର |
ବୁଦ୍ଧିରେ କୁଶଳୀ ମଧୁବାବୁ ପୁଣି ଦେଖାଇଲେ ଚମତ୍କାର,
ପ୍ରଥମ ମନ୍ତ୍ରୀ ସେ ତ୍ୟାଗପତ୍ର ଦେଇ ବେଦରେ କାଟିଲେ ଗାର |
ପଞ୍ଚସଖା ବନ୍ଧୁ ତ୍ୟାଗୀ ଗୋପବନ୍ଧୁ ସ୍ଵାଧୀନତା ଭଗିରଥ,
ଧନ୍ୟ କରିଦେଲେ ଓଡ଼ିଆ ଜାତିକୁ ଧରି ଅହିଂସାର ପଥ |
ପଠାଣି ସାମନ୍ତ ନଳୀ କାଠି ଧରି ମାପିଦେଲେ ହିମାଳୟ,
ଅସଲ ବିଜ୍ଞାନ ସିଦ୍ଧାନ୍ତ ଦର୍ପଣ କୋଟିପ୍ରାଣ କରେଜୟ |
ଜାତିପ୍ରେମୀ ବୀର ଜୟୀ ରାଜଗୁରୁ ସ୍ଵାଧୀନତା ପାଇଁ ଲଢି,
ମଥା ନଇଁଲେନି ପ୍ରଥମ ସହିଦ ଇତିହାସ ଦେଲେଗଢି |
ନେତାଜୀ ସୁଭାଷ କଟକ ମାଟିରେ ଜନ୍ମନେଇ ବୀରହେଲେ,
ପ୍ରଥମ ପ୍ରଧାନମନ୍ତ୍ରୀ ଭାରତର ଜୟହିନ୍ଦ ଡାକଦେଲେ |
ସମ୍ବଲପୁରର ସୁରେନ୍ଦ୍ର ସାଏଙ୍କୁ କିଏ ବା ପାରିବ ଭୁଲି ?
ପ୍ରାଣଦେଲେ ପଛେ ହାରିଲେ ନାହିଁ ସେ ସ୍ଵାଧୀନତା ପଥେଚାଲି |
ତେନ୍ତୁଳିଗୁମାର ଲକ୍ଷ୍ମଣ ନାଏକ ଆମକୁ ଜଗାଇଦେଲେ,
ବଣମୂଲକରେ ମେଳିକରି ପୁଣି ଫାଶିଖୁଣ୍ଟକୁ ଚୁମିଲେ |
ଇଣ୍ଡୋନେସିଆ କି କାଶ୍ମୀର ମାଟି ବିଜୁଙ୍କୁ ଭୁଲିବ ନାହିଁ,
ଝଡ଼ର ଇଗଲ ଝାମ୍ପି ନେଇଗଲେ ଜୀବନେ ବାଜି ଲଗାଇ |
ଜାତିସଂଘ ଦ୍ଵାରେ ଲେଖା ରହିଗଲା ଭୀମଭୋଇ ମନକଥା,
କବିପଣେ ମଧୁ ଗଙ୍ଗାଧର ରାଧାନାଥ ଗାଇଲେ କବିତା |
ବାଲୁକା କଳାରେ ଶିଳ୍ପୀ ସୁଦର୍ଶନ ହକିଖେଳରେ ଦିଲୀପ,
ଆହୁରି ବିଭିନ୍ଣ ଖେଳରେ ଓଡ଼ିଆ ଖେଳାଳି ବିଶ୍ଵ ବିଖ୍ୟାତ |
ଜ୍ଞାନପୀଠ ସରସ୍ଵତୀ ସମ୍ମାନକୁ ପାଇ ଆମ ସାହିତ୍ୟିକ,
ଜାତୀୟ ସ୍ତରରେ ସାହିତ୍ୟ କ୍ଷେତ୍ରରେ ରଖିଲେ ଓଡ଼ିଶା ଟେକ |
ଓଡ଼ିଶୀ ସଙ୍ଗୀତ ଯେମିତି ସୁନ୍ଦର ସେଇମିତି ରସମୟ,
ଆମ ଲୋକଗୀତ ଲୋକକଳା ଯେତେ କୋଟିମନ କରେଜୟ |
ଏଭଳି ସଂସ୍କୃତି ସମ୍ପନ୍ନ ରାଜ୍ୟରେ ଜନମ ହୋଇଛି ମୁହିଁ,
ଅନୁପମା ଯେଣୁ ଉତ୍କଳ ଜନନୀ ଗର୍ବ କରିବି କି ନାହିଁ ?