लाइब्रेरी
प्रोफाइल
वेताळांचा राजा
वेताळांचा राजा
1 min
147
विक्राळ पसरला प्रांत विखारी माझा
मी तिमिर धुरंधर वेताळांचा राजा
भयक्रांत शांत ही थांबुन जाते धरती
आक्रोश हुंदके नुसते नावापुरती
लागतो मला तो किंकाळयांचा वाजा
मी तिमिर धुरंधर वेताळांचा राजा
घेऊन हिंडतो सोबत अपरा शक्ती
कैफात भुतावळ माझी करती भक्ती
नैवद्य हवा मज देह कापुनी ताजा
मी तिमिर धुरंधर वेताळांचा राजा
भस्मास लाविले स्मशानातल्या भाळी
नेसली वस्त्र ती अंगावरती काळी
शृंगार आवडे मला रक्त मासांचा
मी तिमिर धुरंदर वेताळांचा राजा
मी ओठांवरती हास्य ठेवले क्रूर
तांबूस जाहले नेत्र नशेने चूर
ऐकून नाव थरकाप सुटे सर्वांचा
मी तिमिर धुरंदर वेताळांचा राजा
सिंहासन केले प्रेतांचे मी खास
हातात खडग अन खांद्यावरती फास
बेताज बादशा मी तो पाताळाचा
मी तिमिर धुरंदर वेताळांचा राजा
