पाणीपुरी
पाणीपुरी
भरल्या पोटी डिवचत जाते फुगली पाणीपुरी
शेव मीठ अन चाट पाहुनी कोण परततो घरी
आंबटचट्टू पाणी वरुनी आलू चटणी भरे
भीक मागती धरून थाळी मुखात फोडत झरे
सोनेरी वर शेव टाकुनी कांदा उधळे वरी
हात डुंबतो कोपरावरी तमा नसावी तरी
मोजत वाटे अमृत गोळे राजाभैया जरी
हिशेब ठेवी कोण बापुडा मुखात गेल्या वरी
उगाच म्हणती 'हा हा' आणिक 'भैय्या! थांबो जरा'
डोळ्यामधुनी काढत पाणी विनोद होतो खरा
हासत जाती मागे बघुनी किती लोक थांबले
शिव्या घालुनी ग्राहक म्हणती खाणे खोळंबले
संपत जाते आवर्तन अन खेळ तिथे थांबतो
घेउनी सुकी एक पापडी चमू मुखी कोंबतो
ढेकर देउनी सरती मागे खादाडी मंडळी
गाड्याभवती पुन्हा नव्याने तयार होते फळी