दिशाहीन पाखरे

आयुष्याच्या वाटेवरती कोण वागते कसे

मार्ग दाखवी कोल्हे आणिक वाट चालती ससे

मुखवट्यातले खरे चेहरे लपवतात भावना

विश्वासाला मोडत करती लक्ष्मीची याचना

कर्जाखाली गुदमरते का कष्टाची भाकरी

नैतिकतेला तुडवत जाते सरकारी चाकरी

कृतज्ञतेचा कृतघ्नतेने इथे दाबला गळा

लोभापायी मूर्ख माणसे किती सोसती झळा

रंग बदलले सत्तेसाठी दुनियेने आगळे

बनवत सुटला मानव येथे कळप वेगवेगळे

विज्ञानाने पापाचीही भीती का संपली 

विचार करतो निर्मिक आता माया का गुंफली

गोठुन गेल्या सर्व भावना हृदय जणू ठोकळा

गुलाम झाला मेंदू येथे श्वास कुठे मोकळा

नाते इथले स्वार्थापुरते मोठी झाली घरे

आनंदाची वाट विसरली दिशाहीन पाखरे