वारी ऑनलाईन शिक्षणाची

माफ करा मज पांडुरंगा,

कधी केली नाही वारी,

सदा पुजून ज्ञानयज्ञ,

शाळा मानली पंढरी //१//

कुंभारापरी घडवी सुंदर,

ओल्या मातीचा गोळा,

अजाण पाखरांचा थवा,

फुलवी आनंदाचा मळा //२//

ठेवतो मी सदा फुलवत,

विद्यार्थ्यांची ज्ञान लालसा,

भविष्याचे प्रश्न सोडवत,

जपतो नामाचा चालीसा //३//

फळा आणि खडू,

जीवनाचे असे सार, 

पण, आता वाही सदा

ऑनलाईन शिक्षणाचा भार //४//

मृदुंगाचा होता गजर,

फुले वारकऱ्यांचा मळा,

तशी घणघणता घंटा,

बाल गोपाळ होती गोळा //५//