ती...

वर्षामागून वर्ष सरले

सोडा जुने आचार-विचार;

वंशाच्या तेजस्वी पणतीचा

करू सर्वजन स्वीकार.

ती 'कल्पना' ती 'सुनीता'

अवकाश जिंकणारी गजगामिनी;

रणी तळपणारी तलवार

झाशीची ती रणरागिणी.

जोतिबा-साऊने केला

स्त्रीजातीचा उद्धार;

जिजाऊंनी दिला स्वराज्यास

"शिवबा"सम आधार.

लेक- माता- बहीण- पत्नी

तीच आपली जीवनसखी;

तीच सीता तीच द्रौपदी

नाही कोण तिच्यासारखी.

स्वर्गलोकातील ती देवता

का घेता तिचा बळी?

फुलू द्या तिला, तोडू

नका गर्भातील कळी.