सावित्री

आधुनिक विचारांची

स्नुषा लाभली तिजला

जुन्या विचारांची सासू

छेडे वारंवार तिला

वर्ष पहिले सणांचे

हौस खूपच सासूला

दरवेळी रजा घेणे

शक्य नव्हते सूनेला

सासू व्हायची नाराज

अशी कशी नवी पिढी

काळ काम नि वेगाचे

अवघड कोडे बाई

व्रते करी सासूबाई

तिचा नित्य नमस्कार

मनामधे खट्टू सासू

नव्यापुढे मानी हार

वटपौर्णिमेला आला

बाका प्रसंग घराला

अपघात हो मुलाला

पत्नी उशा पायथ्याला

चार दिवस अखंड

केली शर्थ प्रयत्नांची 

जीव वाचवला त्याचा

नवयुग सावित्री ती

नको कर्मकांड तिला

नको अंधश्रद्धा उरी

कर्तव्यासी मानणारी

आधुनिक ती सावित्री