साजणी ... तुला सांगायचे राहून गेले

साजणी ...

तुला सांगायचे राहून गेले ,

तुझ्या मखमाली स्पर्शाने ,

ऋतु वसंताचे फुलून गेले ,

क्षण प्रेमाचे बहरून आले ...

तुझा डोळ्यांशी लपंडाव ,

खोल गहरे लाघवी घाव केले ,

भळभळून येता शहारे रोमरोमांत ,

काळजाचे तुकडे हजार केले ...

साजणी ...

तुला सांगायचे राहून गेले ...

लपलेली मृगकस्तुरी मनात ,

प्रितीने क्षण जीवनाचे गंधाळले ,

फाया अत्तराचा मनगटावर कशाला ,

तुझ्या आठवांचे सुगंध श्वासात भरले ...

तुझी ओढणी वाऱ्यावरी उडते ,

सवे

मनाने हेलकावे घेतले ,

ती स्पर्श करते असा कोवळा ,

नादावल्या मनाने उसासे भरले ...

साजणी ...

तुला सांगायचे राहून गेले ...

या तापलेल्या जमीनीवरी ,

तु सर श्रावणी म्हटले ,

छळू नको गं नाजूक ,

भरती ओहटीचा चंद्र तु ठरले ...

साजणी ...

तुला सांगायचे राहून गेले ...