रंग उषेचे
रंग उषेचे
झेप घेऊनी आकाशी
क्षितिजाच्याही पार झेपावे
आकाक्षांचे पंख पसरूनी
नभोदयाला प्रतिक्षण टिपावे
हात तुझा मग घेऊनी हाती
सुखस्वप्नांचे केशरसडे शिंपावे
दूर सारूनिया तिमिराला
प्रकाशकिरणांशी जिंकावे
उदयातील स्वप्नांवरती घाला
अचाट सामर्थ्याने उभे रहावे
वाटेतील अडथळ्यांचे कुंपण
हसता-खेळता पार करावे
पथदर्शक हे दिवे जे दिसती
यश मार्गक्रमणात त्यासही घ्यावे
एक-एक पाऊल टाकूनी पुढती
यश अमृताचे रसपान प्यावे
सुवर्णमयी नक्षत्रांच्या वेलींनी
जीवनी अपुल्या सदा बहरावे
धुंद मोहक सुगंध झेलीत
दुःखाग्नितील क्षण हे विसरावे
भास्कराने विखुरले रंग उषेचे
निशेचे सावट दूर करावे
घारीसम झेपावूनी पहाटेस
जीवनी उदयाचळीचे रंग भरावे