प्रसन्न
प्रसन्न
अंगणी घातला सडा गेरूचा त्यावर शोभे रांगोळी |
त्यात भरल्या रंगांची चित्ताला वाटे नवी नव्हाळी ||
परसात बहरलेल्या फुलांकडे पाहून निराळीच प्रसन्नता वाटे |
दारी झुलणारे टपोऱ्या झेंडूचे तोरण देखून चैतन्य मनी दाटे ||
देवघरात मंद तेवणारी समई अन् जोडीला धूप - उदबत्तीचा सुवास |
अंतःकरण प्रसन्न करणाऱ्या या सगळ्या गोष्टी आहेत खास ||
भल्या सकाळचा पाखरांचा मंजुळ कलरव मनाला प्रसन्न करतो |
सर्वत्र भरून राहिलेले हळवावरचे पाणी अर्थात दव,
आपले चित्त प्रसन्नतेने भरून टाकते ||
गोड गुलाबी थंडीची चाहूल घेऊन येणारे धुके
देखील अंतरंगात प्रसन्नतेची अनुभूती देते |
शरद ऋतूमध्ये बहरणाऱ्या , उमललेल्या लाल, पिवळ्या,
जांभळ्या फुलांना परडीत घेऊन हृदयी प्रसन्नतेचा वसंत फुलतो ||
निसर्गाने चहूबाजूंना केलेली आपल्या सौंदर्याची पखरण पाहून प्रसन्न होतात नेत्र |
अन् निसर्गाच्या खांद्यावर मस्तक ठेवून चार निवांत क्षण अनुभवता प्रसन्न होतात गात्र ||