श्रावण आठवणी

आला पुन्हा तो श्रावण प्रत्येक स्त्री पाहते ज्याची आतुरतेने वाट ,

जिवलग सखा तो श्रावण येता मनाच्या कालव्यात वाहती स्मृतींचे सुगंधित पाट 

आठवतो तो माहेरचा श्रावण सोमवार अन् आईसोबत पुजलेला हर , 

भोळ्या सांबाच्या भक्तीची वाहत असायची अंतरंगातल्या सागरात लहर ! 

मंगळवारी सुवासिनींच्या सवे लुटायची मंगळागौरीची मजा , 

नानाविध खेळांच्या क्रीडा करता आनंदून जायचा जीव माझा !

शुक्रवारी करून जिवती पूजन आई अर्पायची तिला चणे फुटाणे अन् खीर , 

लेकरांची निगा राख माते , असे म्हणताच आपसूक आईच्या नेत्री यायचे नीर ! 

नागपंचमी येता उरात वेगळीच धडकी भरायची , 

ताकीद होती आई अन् आजीची विळीवर काहीही न चिरायची !

पुरणाची वाफाळती दिंडे त्यावर साजुक तुपाची धार , 

स्वर्गीचे अमृत जणू प्राशन केले असा व्हायचा साक्षात्कार ! 

रक्षाबंधन समीप येता दादाकडून काय मिळेल याची असायची उत्सुकता , 

सजवायची औक्षणाची थाळी दरवर्षी आणून नवी कल्पकता ! 

बालमनात जपून ठेवलेला हा श्रावण आठवून अंगी जणू सुखनैव मोरपीसे फिरतात , 

अन् काळजाच्या जमिनीत ह्याच सुगंधी आठवणींची अलवार पिंपळपाने होतात !